စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့မှ ဦးဆောင်၍ မြန်မာစာရင်းအင်း ဖိုရမ်ကို ယနေ့နံနက် ၈ နာရီခွဲတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန(၂) တွင်ကျင်းပရာ စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီဥက္ကဋ္ဌ ဒုတိယသမ္မတ ဦးဟင်နရီဗန်ထီးယူ တက်ရောက်အဖွင့်အမှာစကား ပြောကြားခဲ့ပါသည်။ အခမ်းအနားကို စာရင်းအင်းဥပဒေအရ စာရင်းအင်းပညာရပ်အား မြှင့်တင် ရန်၊ စာရင်းအင်းထုတ်ဝေသူများနှင့် အသုံးပြုသူများအကြား ဆက်ဆံရေးမြှင့်တင်ရန်၊ စာရင်း အင်းအသုံးပြုသူများ၏ လိုအပ်ချက်များကိုသိရှိဖြည့်ဆည်းပေးနိုင်ရန်၊ စာရင်းအင်းဆိုင်ရာ စာတမ်းဖတ်ပွဲဆောင်ရွက်ရန်နှင့် ကျောင်းသားလူငယ်များအကြား စာရင်းအင်းကဏ္ဍမြှင့်တင်ရေး အတွက် Statistics Quiz ကျင်းပပြီး စီးပွားရေးတက္ကသိုလ်များမှ ထူးချွန်ဆုရရှိသူများအား ဆုချီးမြှင့်ပေးအပ်နိုင်ရန် ရည်ရွယ်ကျင်းပခဲ့ခြင်းဖြစ်ပါသည်။ အခမ်းအနားသို့ စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီဥက္ကဋ္ဌ ဒုတိယသမ္မတဦးဟင်နရီဗန်ထီးယူ၊ စာရင်းအင်းအချက်အလက်မှန်ကန်ရေး နှင့် အရည်အသွေးပြည့်ဝရေးဗဟိုကော်မတီဒုတိယဥက္ကဋ္ဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးဦးစိုးဝင်း၊ စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝ ရေးဗဟိုကော်မတီအဖွဲ့ဝင်များ၊ လွှတ်တော်ကိုယ်စားလှယ်များ၊ တိုင်းဒေသကြီး/ပြည်နယ် အစိုးရအဖွဲ့များမှ စီမံကိန်းနှင့် ဘဏ္ဍာရေးဝန်ကြီးများ၊ စာရင်းအင်းဆိုင်ရာ အစိုးရဌာနများမှ ကိုယ်စားလှယ်များ၊ ပညာရှင်များ၊ သုတေသနအဖွဲ့အစည်းများမှ သုတေသီများ၊ ပုဂ္ဂလိကအဖွဲ့ အစည်းများ၊ အစိုးရမဟုတ်သောအဖွဲ့အစည်းများ၊ ဂျာမနီနှင့် ပူးပေါင်းဆောင်ရွက်မှုအဖွဲ့ (GIZ)၊ ကုလသမဂ္ဂ စားနပ်ရိက္ခာအစီအစဉ် (UNFPA)၊ ကုလသမဂ္ဂဖွံ့ဖြိုးမှုအစီအစဉ် (UNDP)၊ ကုလသမဂ္ဂ အာရှပစိဖိတ်စီးပွားရေးနှင့် လူမှုရေးကော်မရှင် (UNESCAP)၊ ကမ္ဘာ့ဘဏ် (World Bank) ၊ မဲခေါင်အဖွဲ့အစည်း (MI) စသည့် ဖွံ့ဖြိုးမှုမိတ်ဖက်အဖွဲ့အစည်းများမှကိုယ်စားလှယ် များ စုစုပေါင်း (၄၉၀) ​ကျော်တက်ရောက်ခဲ့ကြပါသည်။ စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေးဗဟိုကော်မတီ ဥက္ကဋ္ဌ ဒုတိယသမ္မတဦးဟင်နရီဗန်ထီးယူမှ အဖွင့်အမှာစကားပြောကြားရာတွင် ကမ္ဘာ့နိုင်ငံအသီး သီးတွင် အောက်တိုဘာလ ၂၀ ရက်နေ့ကို ကမ္ဘာ့စာရင်းအင်းနေ့အဖြစ်သတ်မှတ်ပြီး World Statistics Day ကိုငါးနှစ်တစ်ကြိမ် ကျင်းပလျက်ရှိကြောင်း၊ မြန်မာနိုင်ငံတွင်လည်း ၂၀၁၅ ခုနှစ်တွင် ကျင်းပခဲ့ဖူးကြောင်း၊ ယနေ့ ကျင်းပသည့်ဖိုရမ်သည် မြန်မာနိုင်ငံတွင် စာရင်းအင်းပညာ (Statistics Literacy) တိုးမြှင့်စေရန်၊ စာရင်းအချက်အလက်ယဉ်ကျေးမှု (Data Culture) များ ပြန့်ပွားစေရန် ရည်ရွယ်ကျင်းပခြင်းဖြစ်ကြောင်း၊ ဖိုရမ်ကို "Better Data, Better Statistics, Better Lives: Transforming Data Culture in Myanmar" ဟူသည့် ဆောင်ပုဒ်ဖြင့် ကျင်းပ ခြင်းဖြစ်ကြောင်း၊ နိုင်ငံတစ်နိုင်ငံ၏ အမျိုးသားစာရင်းအင်းစနစ် အရည်အသွေးပြည့်ဝမှသာလျှင် မူဝါဒ ချမှတ်သူများ၊ စီမံကိန်းရေးဆွဲသူများ၊ ပုဂ္ဂလိကလုပ်ငန်းရှင်များ၊ လူမှု-စီးပွားသုတေသနဆောင် ရွက်သူများအားလုံးအတွက် ချမှတ်သည့် ဖွံ့ဖြိုးမှုမူဝါဒများ၊ စီမံကိန်းများ၊ စီးပွားရေးဝန်းကျင် ကောင်းများကို ဖန်တီးနိုင်မည့်မူဝါဒများအတွက် ထည့်သွင်းစဉ်းစားရန် အချက်များအား ရရှိနိုင် မည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့်လည်း အချက်အလက်များအပေါ် အခြေခံ ၍ ရင်းနှီးမြှုပ်နှံမှုများကိုဆောင်ရွက်မှသာလျှင် အရှုံးဖြစ်‌ပေါ်နိုင်မှုနှင့် စွန့်စားရမှု (Risk Management) တို့ကို စီမံခန့်ခွဲနိုင်မည်ဖြစ်ကြောင်း၊ ထို့ကြောင့် စာရင်းအင်းအချက်အလက်များ မှန်ကန်စေရေးအတွက် လိုအပ်သည့် လူသားရင်းမြစ်ပြုစုပျိုးထောင်ခြင်း၊ ကွန်ယက်များတည် ဆောက်ခြင်း၊ ပူးပေါင်းဆောင်ရွက်ရေးယန္တရားများနှင့် Statistics Literacy အား မူဝါဒအားဖြင့် အထူးအာရုံစိုက်ခြင်း၊ စာရင်းအင်းဥပဒေပြဋ္ဌာန်းသက်ရောက်မှုရှိစေရေးစသည့် အရင်းအနှီးများ စိုက်ထုတ် ဆောင်ရွက်ရန်လိုအပ်ကြောင်း ပြောကြားခဲ့ပါသည်။ ဆက်လက်၍ စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ဗဟိုကော်မတီဒုတိယဥက္ကဋ္ဌ၊ စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးစိုးဝင်း မှ အမှာစကားပြောကြားရာတွင် အရည်အသွေးပြည့်ဝသော စာရင်းများထုတ်ပြန်နိုင်ခြင်း၊ ဆန်းစစ်လေ့လာခြင်းအားဖြင့် ပြည်သူများ၏ အမှန်တကယ်လိုအပ်ချက်များကိုသိရှိနိုင်ပြီး ပိုမို ကောင်းမွန်သော လူမှုဘဝကိုရရှိစေရန် ထိရောက်ကောင်းမွန်သောမူဝါဒများကို ချမှတ်နိုင်မည် ဖြစ်ကြောင်း၊ စာရင်းအင်းကိစ္စများ ဆောင်ရွက်ရာတွင် နိုင်ငံတကာစာရင်းအင်းစနစ်များနှင့် ကိုက်ညီမှုရှိစေရန် ဗဟိုစာရင်းအင်းအဖွဲ့နှင့် သက်ဆိုင်ရာဝန်ကြီးဌာနများအားလုံး Counterpart အဖြစ် ပူးပေါင်းပါဝင်ဆောင်ရွက်ရန်လိုအပ်ကြောင်း၊ ၂၀၁၈ ခုနှစ် ဇန်နဝါရီလ ၂၂ ရက်နေ့တွင် စာရင်းအင်းဥပဒေ (၁/၂၀၁၈) ကိုပြဋ္ဌာန်းခဲ့ပြီး ဖြစ်ကြောင်း၊ အဆိုပါဥပဒေအရ ၂၀၁၈ ခုနှစ် ၊ ဇွန်လ ၂၆ ရက် ရက်စွဲပါ ပြည်ထောင်စုအစိုးရအဖွဲ့ အမိန့်ကြော်ငြာစာအမှတ် ၇၄/၂၀၁၈ အရ စာရင်းအင်းနှင့်သက်ဆိုင်သော ပြည်ထောင်စုဝန်ကြီး များမှ ဗဟိုကော်မတီအဖွဲ့ဝင်များအဖြစ်ပါဝင်သော စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေးဗဟိုကော်မတီကို အဆင့်မြှင့်တင်ဖွဲ့စည်းပြီးဖြစ်သည့်အတွက် ဖွဲ့စည်းမှု ပိုမိုအားကောင်းပြည့်စုံလာပြီဖြစ်ကြောင်း၊ စာရင်းအင်းမူဝါဒအနှစ်ချုပ် (Statistical Policy Brief) ၊ စာရင်းအင်းဥပဒေ (Statistics Law) ၊ စာရင်းအင်းဆိုင်ရာဖွံ့ဖြိုးမှုအမျိုးသားအဆင့် မဟာဗျူဟာ (National Strategy for Development of Statistics-NSDS) နဲ့ မဟာဗျူဟာ အား အကောင်အထည်ဖော်သည့်စီမံကိန်း (NSDS Action Plan)၊ ပူးပေါင်းဆောင်ရွက်ရေး ယန္တရား (Cooperation Mechanism) များအားလုံးတည်ရှိပြီး စာရင်းအင်းနည်းဥပဒေအား လည်း အပြီးသတ်ဆောင်ရွက်နေပြီဖြစ်သည့်အတွက် မကြာမီထွက်ပေါ်လာတော့မည်ဖြစ်ကြောင်း၊ “စာရင်းအင်းအချက်အလက်များ ပိုမိုအရည်အသွေးမြင့်လေ၊ လူမှုဘဝပိုကောင်းလေ-မြန်မာနိုင်ငံ ၏စာရင်းအချက်အလက် ယဉ်ကျေးမှုပုံစံပြောင်းလဲခြင်း” “Better Data, Better Statistics, Better Lives: Transforming Data Culture in Myanmar” ဆိုသည့် ဆောင်ပုဒ် နှင့်အညီ ကောင်းမွန်သောအကျိုးဆက်များရရှိစေရန် ဝန်ကြီးဌာနများ၊ ဖွံ့ဖြိုးမှုမိတ်ဖက်များ၊ ပညာရှင်များ၊ ပုဂ္ဂလိကကဏ္ဍ၊ လူမှုအဖွဲ့အစည်းများ၊ မီဒီယာကိုယ်စားလှယ်များနှင့်အတူ လက်တွဲပူးပေါင်း ဆောင်ရွက်သွားပြီး တိုးတက်မှုများ ဆက်လက်တည်တံ့စေဖို့ အရှိန်အဟုန်မြှင့်ပြီး ဆက်လက် ဆောင်ရွက်ရန် လိုအပ်ပါကြောင်းစသည်ဖြင့် ပြောကြားခဲ့ပါသည်။ ထို့နောက် ဒုတိယသမ္မတ ဦးဟင်နရီဗန်ထီးယူနှင့်တကွ တက်ရောက်လာကြသော ဧည့်သည်များသည် ခင်းကျင်းပြသထားသော စာအုပ်စာတမ်းများ၊ စာရင်းအင်းဆိုင်ရာ လှုပ်ရှားမှုမှတ်တမ်းဓာတ်ပုံများအား ကြည့်ရှုအားပေးခဲ့ပါသည်။ ၂၀၁၈ ခုနှစ် မြန်မာ စာရင်းအင်း ဖိုရမ်တွင် စာရင်းအင်းပညာအား အသိပညာပေးမြှင့်တင်ခြင်း၊ Round Table Discussion ပြုလုပ်ခြင်း၊ စာရင်းအင်းဆိုင်ရာ စာတမ်း(၁၅) စောင်အား ဖတ်ကြားခြင်း၊ စာရင်းအင်းဆိုင်ရာ ပြခန်းများပြသခြင်း၊ အောက်တိုဘာလ ၁၉ ရက်နေ့တွင် ရန်ကုန်စီးပွားရေး တက္ကသိုလ်၌ ပူးပေါင်းကျင်းပခဲ့သည့် Statistics Quiz တွင် ထူးချွန်ဆုရရှိခဲ့သူများအား ဆုများချီးမြှင့်ခြင်း၊ မြန်မာနိုင်ငံစာရင်းအင်းဝန်ဆောင်မှုစနစ် (MMSIS) အား ပြသခြင်းစသည်တို့ကို ဆောင်ရွက် ခဲ့ပါသည်။ ၂၀၁၈ ခုနှစ် မြန်မာစာရင်းအင်းဖိုရမ်ကို စာရင်းအင်းကဏ္ဍ ပေါင်းစပ်ညှိနှိုင်းရေးအဖွဲ့ (Statistics Sector Coordination Group−SSCG) တွင် ပါဝင်ဆောင်ရွက်လျက်ရှိသည့် မြန်မာနိုင်ငံ၏ စာရင်းအင်းကဏ္ဍဖွံ့ဖြိုးရေးအတွက် ပံ့ပိုးကူညီပေးလျက်ရှိသော ဖွံ့ဖြိုးမှု မိတ်ဖက်အဖွဲ့အစည်းများ၏ အထောက်အပံ့ဖြင့် ကျင်းပပြုလုပ် ခြင်းဖြစ်ပါသည်။ နေပြည်တော် နိုဝင်ဘာ ၂ (သတင်းစဉ်)