စီမံကိန်းနှင့်ဘဏ္ဍာရေးဝန်ကြီးဌာန Website www.mopf.gov.mm Update ဖြစ်စေရေးအတွက် ပြည်ထောင်စုဝန်ကြီးရုံးနှင့် ဝန်ကြီးဌာနအောက်ရှိ ဦးစီးဌာနများ၏ ညှိနှိုင်း အစည်းအဝေးကို ၂၀၁၈ခုနှစ်၊ စက်တင်ဘာလ(၁၃)ရက်နေ့၊ နေ့လည် (၁:၀၀)နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂)အစည်းအဝေးခန်းမ၌ ကျင်းပခဲ့ရာ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားခဲ့ပါသည်။ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင် စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး၏ လမ်းညွှန်မှာကြား ချက်အရ ဝန်ကြီးဌာန Website တွင် ဦးစီးဌာနများနှင့် အဖွဲ့အစည်းများမှ သတင်းများ၊ ဌာနနှင့် ပတ်သက်သော အချက်အလက်များအား Update ပြုလုပ်ရာတွင် လည်းကောင်း၊ Website လုံခြုံရေးပိုင်းတွင်လည်းကောင်း၊ အားနည်းနေပါကြောင်း၊ လမ်းညွှန်လာသည့်အတွက် သက်ဆိုင်ရာဌာနများအနေဖြင့် မိမိတို့ဌာနနှင့် ပတ်သက်သည့် သတင်း အချက်အလက်များအား Update ပြုလုပ်ပေးကြပါရန်နှင့် အခက်အခဲများ၊ အဆင်မပြေမှုများ ရှိပါက ညှိနှိုင်း ဆွေးနွေးပေးနိုင်ရန်အတွက် ယခုကဲ့သို့ အစည်းအဝေး ကျင်းပရခြင်း ဖြစ်ပါကြောင်း၊ ဝန်ကြီးဌာနအောက်ရှိ ဦးစီးဌာန/ အဖွဲ့အစည်း (၂၂) ခု ပါဝင်သော Website အသစ်ကို ပြန်လည်ရေးသားနိုင်ရေးအတွက် ဆောင်ရွက်ခဲ့စဉ်က ထည့်သွင်းမည့် အချက်အလက်များ တောင်းခံခြင်း၊ Website Design နှင့်ပတ်သက်၍ ရှင်းလင်းပြသခြင်းများ ပြုလုပ်ခဲ့ပါကြောင်း၊ Website တွင် ထည့်သွင်းထားရှိသော အချက်အလက်များအား ဦးစီးဌာန/ အဖွဲ့အစည်းများမှ အတည်ပြုချက်ရယူပြီး တရားဝင်လွှင့်တင် နိုင်ခဲ့ပါကြောင်း၊ လွှင့်တင်ထားရှိသော Website တွင် ဦးစီးဌာန/အဖွဲ့အစည်းများမှ မိမိတို့၏ သတင်းနှင့် အချက်အလက်များကို အချိန်နှင့် တစ်ပြေးညီ Update ပြုလုပ်နိုင်ရန် ဝန်ကြီးဌာန Website ရေးသားသော Information Matrix ကုမ္ပဏီမှ သင်တန်းပို့ချပေးခဲ့ပါကြောင်း၊ ဗဟိုစာရင်းအင်း အဖွဲ့မှ ဝန်ကြီးဌာန Website ရှိ Home Page၊ Main Menu၊ Side Menu၊ ပြည်ထောင်စု ဝန်ကြီး၏သတင်းများ၊ ဦးစီးဌာန/အဖွဲ့အစည်းများ၏ Page များရှိ Menu များ Update ပြုလုပ်ခြင်း၊ ပြင်ဆင်ခြင်း လုပ်ငန်းများ၊ ဝန်ကြီးဌာနမှ ထုတ်ဝေသော Publication များ၊ Tender ခေါ်ယူမှုများနှင့် ဦးစီးဌာန/ အဖွဲ့အစည်းများ မှ ပေးပို့လာသော Publication များ၊ Tender ခေါ်ယူမှုများနှင့် အလုပ်ခေါ်ယူမှုများကို တာဝန်ယူ၍ Update ပြုလုပ် ဆောင်ရွက် ပေးလျက်ရှိပါကြောင်း၊ Website လုံခြုံမှုကောင်းမွန်စေရေးနှင့် ဆိုက်ဘာလုံခြုံမှု ကောင်းမွန်စေရန်အတွက် Website များအား Security Socket Layer (SSL) အောက်တွင် ထားရှိပြီး ဝန်ကြီးဌာန Website Server နှင့် ဗဟိုစာရင်းအင်းအဖွဲ့ Website Server များအား ပြင်ပမှ Network ဆိုင်ရာ တိုက်ခိုက်မှုများကို Firewall (၂)လုံးဖြင့် သြဂုတ်လအတွင်း တပ်ဆင်ကာကွယ်ထားပြီး ဖြစ်ပါကြောင်း ပြောကြားခဲ့ပါသည်။ ဆက်လက်၍ ဗဟိုစာရင်းအင်းအဖွဲ့၊ ညွှန်ကြားရေးမှူး ဒေါ်ညိမ်းညိမ်းမော်မှ ဝန်ကြီးဌာန Website Update ပြုလုပ်ဆောင်ရွက်ရန်ကိစ္စများကိုလည်းကောင်း၊ စီမံကိန်းနှင့် ဘဏ္ဍာရေး ဝန်ကြီးဌာန၏ Chief Information Officer (CIO)၊ ပြည်ထောင်စုဝန်ကြီးရုံးမှ ညွှန်ကြားရေးမှူး ဦးဟန်မျိုးအောင်မှ ဝန်ကြီးဌာန Website Update ပြုလုပ်ရန် ကိစ္စများ၊ သတင်းအချက်အလက်များ ပေးပို့ရာတွင် EDMS အသုံးပြုရန်ကိစ္စများ၊ Myanmar National Portal တွင် ချိတ်ဆက်၍ Update ပြုလုပ်ရန် ကိစ္စများကို ဆွေးနွေးခဲ့ပြီး အစည်းအဝေး တက်ရောက်လာသူများမှ မိမိတို့ ဌာနများ၏ သတင်းအချက်အလက် Update ဆောင်ရွက် နေမှုများနှင့် ရှေ့ဆက်ဆောင်ရွက်မည့် လုပ်ငန်းများကို ဝိုင်းဝန်းဆွေးနွေးကြပါသည်။ ထို့နောက် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ ဝန်ကြီးဌာနမှ ဆောင်ရွက်နေသည့် လုပ်ငန်းများ၊ ဌာန၏ လုပ်ငန်းတာဝန်များ၊ သတင်း အချက်အလက်များအား ပြည်သူများသို့ အသိပေးနိုင်ရန်အတွက် ဝန်ကြီးဌာန Website တွင် Update သတင်းများ လွှင့်တင်နိုင်ရန် လိုအပ်ပါကြောင်း၊ Website တွင် သတင်း အချက်အလက်များ ဖော်ပြခြင်းဖြင့် ပြည်သူများအတွက် ပွင့်လင်းမြင်သာမှုကို ခံစား ရရှိစေနိုင်ပါကြောင်း၊ Website တွင် Update ပြုလုပ်ခြင်းသည် နိုင်ငံတော်မှ ဦးတည် ဆောင်ရွက်နေသည့် e-Government ၏အစိတ်အပိုင်း တစ်ခုဖြစ်ပါကြောင်း၊ ဌာနများ အားလုံး ဝိုင်းဝန်း ပူးပေါင်းဆောင်ရွက်ခြင်းဖြင့် ပြည်သူများသို့ သတင်းအချက်အလက်များ အချိန်နှင့် တစ်ပြေးညီ ထုတ်ပြန်ပေးသည့် ဝန်ကြီးဌာန၏Website ဖြစ်လာမည် ဖြစ်ပါကြောင်း နိဂုံးချုပ် အမှာစကား ပြောကြား ခဲ့ပါသည်။ အဆိုပါ အစည်းအဝေးသည် ဝန်ကြီးဌာန၏ သတင်းအချက်အလက်များ၊ ဌာနများမှ ဆောင်ရွက်နေသည့် အစည်းအဝေးများ၊ အစီရင်ခံစာများ၊ ဥပဒေ၊ နည်းဥပဒေနှင့် လုပ်ထုံးလုပ်နည်းများကို ပြည်သူများသို့ အသိပေးနိုင်ရန်နှင့် ပွင်းလင်းမြင်သာမှုရှိစေရန် အတွက် ဝန်ကြီးဌာန Website တွင် အချိန်နှင့် တစ်ပြေးညီ Update ပြုလုပ်နိုင်ရန် ရည်ရွယ်၍ ကျင်းပခဲ့ခြင်းဖြစ်ပါသည်။(သတင်းစဉ်) နေပြည်တော်၊ စက်တင်ဘာလ (၁၃) ရက်