မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable DevelopmentPlan-MSDP)ကို အကောင်အထည် ဖော်ဆောင်ရာ၌ စောင့်ကြည့်အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework-NIF) တစ်ရပ် ဖွံ့ဖြိုးလာစေရေး ဆွေးနွေးညှိနှိုင်းပွဲကို ၂၀၁၈ခုနှစ်၊ ဩဂုတ်လ (၇) ရက်နေ့၊ နံနက် (၉:၃၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၃၂) အစည်းအဝေးခန်းမ၌ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်မှ  အဖွင့်အမှာစကား ပြောကြားခဲ့ပါသည်။

          စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်မှ  အဖွင့်အမှာစကား ပြောကြားရာတွင် အမျိုးသားညွှန်ကိန်းမူဘောင် (National Indicator Framework-NIF) သတ်မှတ်ဖော်ထုတ်ရာတွင် သက်ဆိုင်ရာဌာနများမှ ပူးပေါင်းဆောင်ရွက်မှုသည် အရေးကြီး ပါကြောင်း၊ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုအတွက် စီးပွား​ရေး၊ လူမှုရေးနှင့် သဘာဝပတ်ဝန်းကျင်ထိန်းသိမ်းရေး မဏ္ဍိုင်ကြီး(၃) ရပ် ဟန်ချက်ညီမှသာ Sectoral Plan မှ Strategic Plan သို့ ရရှိနိုင်မည် ဖြစ်ပါကြောင်း၊ ယခင်က ဝန်ကြီးဌာနများမှ မိမိတို့ ဌာနအလိုက် Sectoral Plan များ ရေးဆွဲတင်ပြပြီး အားလုံးစုပေါင်းပြီးမှ Strategic Plan ကို ရေးဆွဲပါကြောင်း၊ နောက်ပိုင်းတွင် Strategic Plan မှ ပြဋ္ဌာန်းထားသည့် မဟာဗျူဟာ အကောင်အထည်ဖော်ဆောင်နိုင်ရန်အတွက် သက်ဆိုင်ရာ ဝန်ကြီးဌာနများအနေဖြင့် Sectoral Plan များ ပြန်လည်ရေးဆွဲရမည်ဖြစ်ပါကြောင်း၊ ဝန်ကြီးဌာနအချင်းချင်း Coordination ချိတ်ဆက်မှုကောင်းမွန်ရန်အတွက် အဓိကလိုအပ်ချက်မှာ Sectoral Plan ဖြစ်ပါကြောင်း၊ စီမံကိန်းများ တိတိကျကျ အကောင်အထည်ဖော်ဆောင်ရွက်ရန် Project Bank စတင် တည်ထောင်နေပြီ ဖြစ်ပါကြောင်း၊ Strategic Plan များ Comprehensive Implementation ရရှိရန်အတွက် Implementation Matrix လိုအပ်ပါကြောင်း၊ Implementation ကောင်းမွန် ရန်အတွက် Monitoring ပြုလုပ်ရန် Indicator များလိုအပ်ပါကြောင်း၊ စီမံကိန်းများအား Monitoring and Evaluation ပြုလုပ်ရန် အမျိုးသားညွှန်ကိန်းမူဘောင် (National Indicator Framework-NIF) ကို ဝန်ကြီးဌာနများအားလုံး ပူးပေါင်းဆောင်ရွက်ကြရန် လိုအပ်ပါကြောင်း ပြောကြားခဲ့ပါသည်။

ဆက်လက်၍ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ နှုတ်ခွန်းဆက်အမှာစကား ပြောကြားရာတွင် MSDP စီမံကိန်းကို အောင်မြင်စွာ အကောင် အထည်ဖော်ဆောင်နိုင်ရေးနှင့် အကောင်အထည်ဖော်ဆောင်နိုင်မှု အတိုင်းအတာကို သတ်မှတ် တိုင်းတာမှုများ ပြုလုပ်ကာစောင့်ကြည့် လေ့လာအကဲဖြတ်ရေး (Monitoring & Evaluation) လုပ်ငန်း ပြုလုပ်နိုင်ရေးအတွက်  မရှိမဖြစ်လိုအပ်သည့် အမျိုးသားအဆင့် ညွှန်ကိန်းမူဘောင် ချမှတ်နိုင်ရန် လိုအပ်ပါကြောင်း၊

အမျိုးသားညွှန်ကိန်းမူဘောင် သတ်မှတ်ဖော်ထုတ်ရာတွင် စီမံကိန်းပါ မဟာဗျူဟာများ၊ လုပ်ငန်းအစီအစဉ်များအတွက် လိုအပ်သည့် ညွှန်ကိန်းများရှာဖွေဖော်ထုတ်ခြင်း၊ အတည်ပြုခြင်း၊ တွက်ချက်ထုတ်ပြန်ခြင်းတို့ကို မြန်မာနိုင်ငံ အမျိုးသားစာရင်းအင်း ညှိနှိုင်းရေးအဖွဲ့ဖြစ်သည့် ဗဟိုစာရင်းအင်းအဖွဲ့အနေဖြင့် UNDP ၏ နည်းပညာအကူအညီများရယူပြီး နိုင်ငံအတွင်းရှိ အစိုးရဌာန၊ အစိုးရအဖွဲ့အစည်းများ၊ အစိုးရမဟုတ်သော အဖွဲ့အစည်းများ၊ ဖွံ့ဖြိုးမှုမိတ်ဖက် များနှင့်  အတူတကွ လက်တွဲဆောင်ရွက်သွားရမည် ဖြစ်ပါကြောင်း၊ MSDP သည် SDGs ပါ ဦးတည်ချက်များကို အခြေပြု ရေးဆွဲထားသည့်အတွက် Monitoring & Evaluation ပိုင်းတွင် ခိုင်မာအားကောင်းရန် အလွန်အရေးကြီးပါသဖြင့် National Indicator Framework တစ်ခု ရေးဆွဲချမှတ်ဖို့ လိုအပ်လာပါကြောင်း၊ MSDP အတွက် ညွှန်ကိန်းများကို ရွေးချယ်သတ်မှတ် ရာတွင် သက်ဆိုင်ရာလုပ်ငန်းနယ်ပယ်အတွင်း လက်တွေ့လုပ်ငန်းများ ဆောင်ရွက်နေသည့် ဌာန များ၏သဘောထားများ၊ အကြံဉာဏ်များ လိုအပ်မှာဖြစ်ပြီး သက်ဆိုင်ရာဌာနများ၏ သဘော တူညီချက်ဖြင့်သာ ညွှန်ကိန်းများကို ရွေးချယ်သတ်မှတ်သွားမည်ဖြစ်ပြီး ရွေးချယ်ဆောင်ရွက် နိုင်ရန်အတွက် Task Team (၁၃) ခု ဖွဲ့စည်းဆောင်ရွက်သွားမည် ဖြစ်ပါကြောင်း၊ Task Team တစ်ခုချင်းစီနှင့် သီးသန့်အစည်းအဝေးများကို လာမည့်အပတ်မှစ၍ ဗဟိုစာရင်းအင်းအဖွဲ့မှ Focal အနေဖြင့် တာဝန်ယူဆောင်ရွက်သွားမည်ဖြစ်ပါကြောင်း၊ Task Team (၁၃)ခု၏ Chair အဖြစ်တာဝန်ယူမည့် ဝန်ကြီးဌာနနှင့် Member များစာရင်းကိုလည်း ဖြန့်ဝေပေးထားပြီး ဖြစ်ပါကြောင်း၊ ဌာနအသီးသီးမှ တွက်ချက်လိုက်သည့် စာရင်းအင်းများသည် နိုင်ငံတကာမှ သတ်မှတ်ထားသည့် တွက်ချက်မှု နည်းလမ်းများ/ စံနှုန်းများနှင့် လိုက်လျောညီထွေမှုရှိမှသာ တစ်ပြေးညီ စာရင်းအင်းများ ရရှိနိုင်မှာဖြစ်ပြီး အိမ်နီးချင်းနိုင်ငံများ၊ အာဆီယံနိုင်ငံများအပြင် ကမ္ဘာ့နိုင်ငံများနှင့်ပါ နှိုင်းယှဉ်လေ့လာသုံးသပ်မှုများ ပြုလုပ်နိုင်မှာဖြစ်ပါကြောင်း ပြောကြားသွား ပါသည်။

ထိုနောက် ကုလသမဂ္ဂဖွံ့ဖြိုးမှုအစီအစဉ် (UNDP) မှ Deputy Country Director, Ms. Dawn Del Rio မှ နှုတ်ခွန်းဆက် အမှာစကား ပြောကြားရာတွင် ယခုပြုလုပ်သည့် ဆွေးနွေးပွဲ သည် MSDP အကောင်အထည်ဖော်ဆောင်ရာတွင် အကျိုးသက်ရောက်မှုရှိ၍ ရေရှည်တည်တံ့ ပြီး ထိရောက်မှုရှိစေသည့် အထောက်အကူနှင့် ပံ့ပိုးကူညီမှုများ ရရှိနိုင်မည်ဖြစ်ပါကြောင်း၊  အမျိုးသားညွှန်ကိန်းမူဘောင်သည် MSDP အချိန်နှင့် တစ်ပြေးညီ ဖွံ့ဖြိုးတိုးတက်စေရေးအတွက် ဦးဆောင်လမ်းညွှန်မှုပေးနိုင်မည်ဖြစ်ပါကြောင်း၊ ပထမအချက်အနေဖြင့် MSDP သည် လက်ရှိ ကဏ္ဍနှင့် ဆက်လက်ဆောင်ရွက်မည့် စီမံကိန်းနှင့် မူဝါဒများအတွက် အကျိုးကျေးဇူး အများဆုံး ရရှိနိုင်မည်ဖြစ်ပါကြောင်း၊ ဒုတိယအနေဖြင့် MSDP သည် ဒေသတွင်းဖွံ့ဖြိုးမှုအတွက် လိုအပ် ချက်များနှင့် ကမ္ဘာ့စဉ်ဆက်မပြတ်ဖွံ့ဖြိုးမှုအစီအစဉ်အကြား စဉ်ဆက်မပြတ်ဖွံ့ဖြိုးမှု ပန်းတိုင် များ၏ ရည်မှန်းချက်များဖြင့် ပေါင်းစည်းနိုင်ရန် အထောက်အကူပြုနိုင်မည် ဖြစ်ပါကြောင်း ပြောကြားသွားပါသည်။

ဆက်လက်၍ စီမံကိန်းနှင့်ဘဏ္ဍာရေးဝန်ကြီးဌာန မြန်မာဖွံ့ဖြိုးမှု အဖွဲ့အစည်း (MDI) မှ Senior Operations Specialist ဒေါ်သီတာနွယ် မှ “Presentation on Myanmar Sustainable Development Plan”  ခေါင်းစဉ်ဖြင့် လည်းကောင်း၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ “Presentation for paving the way to consider for developing of National Indicator Framework” ခေါင်းစဉ်ဖြင့် လည်းကောင်း၊  ကုလသမဂ္ဂဖွံ့ဖြိုးမှုအစီအစဉ် (UNDP) မှ Monitoring and Evaluation Expert, Mr. Nicolas Garrigue မှ “Presentation on Methodology for Development of MSDP Indicators Framework”  ခေါင်းစဉ်ဖြင့် အသီးသီး ရှင်းလင်းပြောကြားခဲ့ကြ ပါသည်။

နေ့လည်ပိုင်းတွင် လုပ်ငန်းအဖွဲ့များ (Task Team) အလိုက် ဆွေးနွေးတင်ပြကြပြီး ညွှန်ကြားရေးမှူးချုပ် ဒေါက်တာဝါဝါမောင်မှ လုပ်ငန်းအဖွဲ့များ (Task Team) အလိုက် လုပ်ငန်း တာဝန်များနှင့် ရှေ့ဆက်ဆောင်ရွက်မည့် လုပ်ငန်းစဉ်များကို ဆွေးနွေးတင်ပြခဲ့ပြီးနောက် နိဂုံးချုပ်စကား ပြောကြားကာ အခမ်းအနားကို ရုပ်သိမ်းခဲ့ပါသည်။

ဆွေးနွေးပွဲသို့ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး၊ သက်ဆိုင်ရာဝန်ကြီး ဌာနများနှင့် အဖွဲ့အစည်းများမှ တာဝန်ရှိသူများ၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ ဖော်ဆောင်နိုင်ရေးလုပ်ငန်း အဖွဲ့ခေါင်းဆောင်များ၊  မြန်မာနိုင်ငံ၏ ရေရှည်တည်တံ့ ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (Myanmar Sustainable Development Plan-MSDP) အကောင်အထည်ဖော်ဆောင်ရေး နည်းပညာအဖွဲ့များနှင့် တာဝန်ရှိသူများ အပါအဝင် စုစုပေါင်း (၁၉၀) ဦးခန့် တက်ရောက်ခဲ့ကြပါသည်။ (သတင်းစဉ်)

နေပြည်တော်၊  ဩဂုတ်လ (၇) ရက်