၂၀၁၈ ခုနှစ်၊ ဇွန်လ (၄) ရက်နေ့တွင်   စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်း အဖွဲ့၊ ရုံးအမှတ်(၃၂)၊ အစည်းအဝေးခန်းမ၌  ဗဟိုစာရင်းအင်းအဖွဲ့သို့ လေ့လာရေးခရီး လာရောက်သည့် ရန်ကုန်စီးပွားရေးတက္ကသိုလ် အသုံးချစာရင်းအင်းပညာ မဟာတန်းမှ ပထမနှစ် ကျောင်းသား ကျောင်းသူများအား ကြိုဆိုနှုတ်ခွန်းဆက်သည့် အခမ်းအနားကျင်းပခဲ့ရာ ညွှန်ကြားရေးမှူးချုပ် ဒေါက်တာဝါဝါမောင်မှ နှုတ်ခွန်းဆက် အမှာစကား ပြောကြားခဲ့ပါသည်။  ထို့နောက် စာရင်းအင်းပညာဌာနမှ ပါမောက္ခဌာနမှူး ဒေါက်တာမော်မော်ခင်မှ ကျေးဇူးတင်စကား ပြောကြားခဲ့ပါသည်။

ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ ဗဟိုစာရင်းအင်း အဖွဲ့၏ လုပ်ငန်းဆောင်ရွက်နေမှုများ၊ ဗဟိုစာရင်းအင်းအဖွဲ့၏ ရည်မှန်းချက် (Vision)၊ လုပ်ငန်းစဉ်များနှင့် တာဝန်များ(Mission)၊ စာရင်းအင်းဆိုင်ရာ ဖွံ့ဖြိုးမှု အမျိုးသားအဆင့် မဟာဗျူဟာ (National Strategy for Development of Statistics- NSDS) အကောင် အထည်ဖော် ဆောင်ရွက်ရာတွင် အရှိန်အဟုန်မြှင့်တင်၍ ဆောင်ရွက်နေမှုများ၊ စာရင်းအင်း ဥပဒေနှင့် အမျိုးသားစာရင်းအင်းစနစ်အကြောင်း  ရှင်းလင်းပြောကြားခဲ့ပြီး ကျောင်းသား ကျောင်းသူများက သိရှိလိုသည်များကို မေးမြန်းခဲ့ကြပါသည်။  ထို့နောက် ဗဟိုစာရင်းအင်း အဖွဲ့၏ လုပ်ငန်းဆောင်ရွက်နေမှုများကို လှည့်လည်ကြည့်ရှုခဲ့ကြပါသည်။

၁၉၇၄ ခုနှစ် ဖေဖော်ဝါရီလ (၁၈) ရက်​နေ့တွင် ဗဟိုစာရင်းအင်းနှင့် စီးပွားရေးရာဌာနကို ဗဟိုစာရင်းအင်းအဖွဲ့ဟု ပြောင်းလဲဖွဲ့စည်းခဲ့ပါသည်။ ၂၀၁၂-၂၀၁၃ ခု ဘဏ္ဍာနှစ်မှစ၍ တိုင်း ဒေသကြီးနှင့် ပြည်နယ်များတွင် ဗဟိုစာရင်းအင်းအဖွဲ့ ရုံးခွဲများဖွင့်လှစ်ခဲ့ရာ ယခုအခါ ရုံးခွဲပေါင်း(၄၆)ရုံး ဖွင့်လှစ်နိုင်ခဲ့ပြီးဖြစ်ပါသည်။  ဗဟိုစာရင်းအင်းအဖွဲ့အနေဖြင့် ၁၉၅၂ ခုနှစ် ဗဟိုစာရင်းစစ်တမ်းကောက်ယူရေး အာဏာပိုင်ဥပဒေကို ပြင်ဆင်ရေးဆွဲပြီး စာရင်းအင်းဥပဒေ (၂၀၁၈) ကို ပြဋ္ဌာန်းခဲ့ပါသည်။ ဗဟိုစာရင်းအင်းအဖွဲ့သည် စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေးကော်မတီ၏ အတွင်းရေးမှူးရုံးအဖြစ် စာရင်းအင်း ဆိုင်ရာကိစ္စရပ်များကို ဝန်ကြီးဌာနအချင်းချင်း ပူးပေါင်းဆောင်ရွက်မှု(Horizontal Cooperation) နှင့် တိုင်းဒေသကြီး/ပြည်နယ်များနှင့် ပူးပေါင်းဆောင်ရွက်မှု(Vertical Cooperation) များဖြင့်  အရည်အသွေးပြည့်ဝသည့် စာရင်းအင်းအချက်အလက်များကို အချိန်နှင့်တစ်ပြေးညီ ထုတ်ပြန်လျက်ရှိပြီး မှန်ကန်သည့် စီမံကိန်းများနှင့် မူဝါဒများ ချမှတ်နိုင်ရန်အတွက် အဓိက ပံ့ပိုးကူညီပေးလျက်ရှိပါသည်။

(သတင်းစဉ်)

နေပြည်တော်၊၂၀၁၈ ခုနှစ်၊ ဇွန်လ (၄) ရက်