အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီ၏ ကနဦးလိုအပ်ချက် စစ်တမ်း ကောက်ယူရေး၊ ပျက်စီးဆုံးရှုံးမှုအတည်ပြုရေးနှင့် လိုအပ်ချက်များဆန်းစစ်ဖော်ထုတ်ရေး လုပ်ငန်းကော်မတီ (၁/၂၀၂၂ ) အစည်းအဝေးကို ယမန်နေ့၊ နံနက် (၉:၀၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ် (၂၆) အစည်းအဝေးခန်းမ၌ ကျင်းပပြုလုပ်ရာ လုပ်ငန်းကော်မတီဥက္ကဋ္ဌ၊ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စု ဝန်ကြီးက အဖွင့်အမှာ စကားပြောကြားပြီး လုပ်ငန်းကော်မတီအတွင်းရေးမှူး၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်က လုပ်ငန်းကော်မတီ၏ ဆောင်ရွက်ချက်များ၊ တိုးတက်မှုအခြေအနေများ၊ သဘာဝဘေးအန္တရာယ် ဆိုင်ရာစစ်တမ်း (၂၀၂၁) ခုနှစ် ကောက်ယူခဲ့ခြင်းတို့နှင့်စပ်လျဉ်း၍ ရှင်းလင်းတင်ပြခဲ့ပါသည်။

ဆက်လက်၍ လုပ်ငန်းကော်မတီအဖွဲ့ဝင်များက တိုင်းဒေသကြီး/ပြည်နယ်အလိုက်  လုပ်ငန်းဆောင်ရွက်မှုအခြေအနေများ၊ တွေ့ကြုံရသည့်အခက်အခဲများနှင့် သဘာဝဘေးအန္တရာယ် ဆိုင်ရာ စစ်တမ်းကောက်ယူရေးကိစ္စရပ်များအား အသီးသီးဆွေးနွေးတင်ပြကြပါသည်။

ပြည်ထောင်စုဝန်ကြီးက အမှာစကားပြောကြားရာတွင် အချိန်ကာလအလျောက် ဖြစ်ပေါ်လာနိုင်သည့် သဘာဝဘေးအန္တရာယ်များကို ကြိုတင်တွက်ဆပြီး ကာကွယ်စောင့်ရှောက်ရေး အစီအမံများ၊ ဘေးအန္တရာယ်မကျရောက်မီဆောင်ရွက်ရမည့်အစီအစဉ်များကို စနစ်တကျကြိုတင် ပြင်ဆင်ထားရေး၊ သဘာဝဘေးအန္တရာယ် ကျရောက်လာသည့်အခါတွင် ကယ်ဆယ်ရေးနှင့် ကူညီ ထောက်ပံ့ရေးလုပ်ငန်းများကို လျင်မြန်ထိရောက်စွာ စီမံခန့်ခွဲဆောင်ရွက်ပေးနိုင်ရေး၊ ဘေး အန္တရာယ်တစ်ခုဖြစ်ပွားပြီးနောက် ကနဦးလိုအပ်ချက်များ၊ ရေရှည်အတွက် လိုအပ်ချက်များ၊ သဘာဝ ဘေးအန္တရာယ်ကြောင့် ထိခိုက်ဆုံးရှုံးနိုင်သည့်အခြေအနေများကို ဆန်းစစ်ဖော်ထုတ်ရေး၊ ဘေး အန္တရာယ်ကြိုတင်ကာကွယ်ရေးနှင့် ဖွံ့ဖြိုးတိုးတက်ရေးကိုဦးတည်သည့် ပြန်လည်ထူထောင်ရေး လုပ်ငန်းများအတွက် လိုအပ်ချက်များဖော်ထုတ်ရေး၊ တိုင်းဒေသကြီး/ပြည်နယ်များတွင် သဘာဝဘေး အန္တရာယ်ဆိုင်ရာစစ်တမ်းများကောက်ယူရေး၊ ဘေးအန္တရာယ်ကျရောက်ပြီးနောက်ပိုင်း ပြန်လည်ထူ ထောင်ရေးနှင့် ပြန်လည်တည်ဆောက်ရေးလုပ်ငန်းများ ဆောင်ရွက်နိုင်ရန်အတွက် လိုအပ်ချက် များကို အချိန်နှင့်တစ်ပြေးညီဖြည့်ဆည်းပေးနိုင်ရေး၊ ထိရောက်သည့် အရင်းအမြစ်ခွဲဝေမှုဖြစ်စေရေးနှင့် ဘေးအန္တရာယ်ခံစားရသူတိုင်း အကူအညီရရှိနိုင်ရေး၊ သက်ဆိုင်ရာဝန်ကြီးဌာနများနှင့် တိုင်းဒေသကြီး /ပြည်နယ်အစိုးရအဖွဲ့များအကြား အချိတ်အဆက်မိမိပူးပေါင်းဆောင်ရွက်ရေး၊  စာရင်းဇယားအချက် အလက်များ တိကျမှန်ကန်ရေးနှင့် မြေပြင်အခြေအနေနှင့် ကိုက်ညီစေရေးတို့ကို လမ်းညွှန်မှာကြားခဲ့ ပါသည်။

အစည်းအဝေးသို့ အထွေထွေအုပ်ချုပ်ရေးဦးစီးဌာန၊ ကျေးလက်ဒေသဖွံ့ဖြိုးတိုးတက်ရေး ဦးစီးဌာန၊ ဆက်သွယ်ရေးညွှန်ကြားမှုဦးစီးဌာန၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာန၊ အဆောက်အဉီဦးစီးဌာန၊ လမ်းဦးစီးဌာန၊ ကျေးလက်လမ်းဖွံ့ဖြိုးရေးဦးစီးဌာန၊ လူမှုဝန်ထမ်းဦးစီးဌာနနှင့် ဘေးအန္တရာယ် ဆိုင်ရာစီမံခန့်ခွဲမှုဦးစီးဌာနတို့မှ လုပ်ငန်းကော်မတီအဖွဲ့ဝင်များ တိုင်းဒေသကြီး/ပြည်နယ်အစိုးရအဖွဲ့ အတွင်းရေးမှူးများနှင့် ဗဟိုစာရင်းအင်းအဖွဲ့မှ တာဝန်ရှိသူများ တက်ရောက်ခဲ့ကြပါသည်။