စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ကျန်းမာရေးနှင့်အားကစား ဝန်ကြီးဌာန၊ UNICEF (မြန်မာ)နှင့် Telenor တို့မှ ပူးပေါင်း၍ မိုဘိုင်းနည်းပညာအသုံးပြု၍ ဖွားသေမှတ်ပုံတင်ခြင်းစမ်းသပ်စီမံချက်ကို မွန်ပြည်နယ်တွင် ဆောင်ရွက်ရန်အတွက် “Launching Ceremony on Mobile Birth and Death Registration” အခမ်းအနားကို  ၂၀၁၈ ခုနှစ်၊ ဩဂုတ်လ (၂၇) ရက်နေ့၊ နံနက် (၉:၃၀) နာရီတွင် Grand Amara ဟိုတယ်၌ကျင်းပခဲ့ပါသည်။

အခမ်းအနားသို့ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စု ဝန်ကြီးဦးကျော်တင်၊ မွန်ပြည်နယ်၊ လူမှုရေးဝန်ကြီးဒေါက်တာထိန်လင်း၊ စီမံကိန်းနှင့်ဘဏ္ဍာရေး ဝန်ကြီးဌာန၊ ဒုတိယဝန်ကြီးဦးဆက်အောင်၊ ပြည်ထဲရေးဝန်ကြီးဌာန၊ အမြဲတမ်းအတွင်းဝန် ဦးတင်မြင့်၊ ဗဟိုစာရင်းအင်းအဖွဲ့၊ ဒုတိယညွှန်ကြားရေးမှူးချုပ်ဦးသန်းဇော်၊ ပြည်သူ့ကျန်းမာ ရေးဦးစီးဌာန၊ ဒုတိယညွှန်ကြားရေးမှူးချုပ်ဒေါ်သက်သက်မူ၊ UNICEF နှင့် Telenor တို့မှ ကိုယ်စားလှယ်များ၊ ဖွံ့ဖြိုးမှုမိတ်ဖက်များ၊ မွန်ပြည်နယ်မှသက်ဆိုင်ရာဌာနဆိုင်ရာများ၊ ဖိတ်ကြား ထားသူများ အပါအဝင်စုစုပေါင်း (၁၀၀) ဦးခန့် တက်ရောက်ခဲ့ကြပါသည်။

အခမ်းအနားတွင် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စု ဝန်ကြီးဦးကျော်တင်၊  စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီးဦးဆက်အောင်၊ UNICEF မှ ဌာနေကိုယ်စားလှယ်၊ Ms.June Kunugi နှင့်  တယ်လီနောအုပ်စုမှ အမှုဆောင် ဒုတိယဥက္ကဋ္ဌဖြစ်သူ Mr. Petter Furberg တို့မှ အဖွင့်အမှာစကားပြောကြားခဲ့ပါသည်။

အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီး ဦးကျော်တင်  အဖွင့်အမှာစကားပြောကြားရာတွင် UNICEF နှင့် Telenor တို့မှနည်းပညာနှင့် လိုအပ်သော Tablet များပံ့ပိုး၍ ဒစ်ဂျစ်တယ်စနစ်ဖြင့် မွေးဖွားမှုနှင့်သေဆုံးမှုဆိုင်ရာ မှတ်ပုံတင်ခြင်းကို မွန်ပြည်နယ်တွင် စတင်အကောင်အထည်ဖော်ရန် မိတ်ဆက်ပေးသည့် အခမ်းအနားဖြစ်ပါကြောင်း၊  မြန်မာနိုင်ငံအနေဖြင့် ဒစ်ဂျစ်တယ်စီးပွားရေးစနစ် ပေါ်ပေါက် လာရန် လွန်ခဲ့သော (၂) နှစ်မှစတင်၍ အကောင်အထည်ဖော် ဆောင်ရွက်လျက်ရှိသောကြောင့် ယခုစီမံချက်သည် မြန်မာနိုင်ငံ၏ ဒစ်ဂျစ်တယ်စီးပွားရေးစနစ် ပေါ်ပေါက်လာစေရန်အတွက် အလားအလာကောင်းသော စီမံချက်တစ်ခုဖြစ်ပါကြောင်း၊ မြန်မာနိုင်ငံ၏မိုဘိုင်းဖုန်း အသုံးပြုမှုမှာ တစ်နိုင်ငံလုံးအတိုင်းအတာဖြင့် ၁၀၀% အထိ ကျယ်ပြန့်စွာသုံးစွဲနေပြီ ဖြစ်ပါကြောင်း၊ ယခုစီမံချက်သည် ပြည်သူ့ကျန်းမာရေးဝန်ထမ်းများ၊ သားဖွားဆရာမများကို Tablet များနှင့် နည်းပညာများပံ့ပိုးပေး၍ ကျေးလက်ဒေသများအထိ မွေးဖွားမှုမှတ်ပုံတင်ခြင်း ကိုဒစ်ဂျစ်တယ်စနစ်ဖြင့် ကောက်ယူမည့်စီမံချက်ဖြစ်ပြီး နိုင်ငံ၏ကျန်းမာရေးကဏ္ဍနှင့် စာရင်းအင်းကဏ္ဍများတွင် မိုဘိုင်းနည်းပညာကို အသုံးချနိုင်မည့်နမူနာကောင်းဖြစ်ပါကြောင်း ပြောကြားခဲ့ပါသည်။

စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီးဦးဆက်အောင်မှ အဖွင့်အမှာစကား ပြောကြားရာတွင် UNICEF နှင့် Telenor တို့ပူးပေါင်း၍ ဖွားသေမှတ်ပုံတင်ခြင်းစနစ်ကို မိုဘိုင်းနည်းပညာအသုံးပြု၍ Online မှတစ်ဆင့် ကောက်ယူရန်အတွက် မွန်ပြည်နယ်တွင် စမ်းသပ်ဆောင်ရွက်သွားမည်ဖြစ်ပါကြောင်း၊ ၄င်းစီမံချက်မှရရှိလာသည့် လက်တွေ့ကျသည့် အချက်အလက်များကို နိုင်ငံတစ်ဝှမ်း e-Platform ဖြင့် ဖွားသေစာရင်းအင်းများ မှတ်ပုံတင်ခြင်းကို ဆောင်ရွက်နိုင်ရန်အတွက် မူဝါဒများရေးဆွဲရာတွင် အထောက်အကူပြုနိုင်မည် ဖြစ်ပါကြောင်း၊ စီးပွားရေးမူဝါဒ (၁၂) ရပ်တွင် E-Government အကောင်အထည်ဖော် ဆောင်ရွက်ရေးသည်လည်း ပါဝင်ပါကြောင်း၊ (၂၀၀၁-၂၀၀၅) ခုနှစ်အတွင်း ဖွားသေစာရင်းအင်း များမှတ်ပုံတင်ခြင်းကို တစ်နိုင်ငံလုံးတွင် အကောင်အထည်ဖော်ဆောင်ရွက်ခဲ့ပါကြောင်း၊ (၂၀၀၇-၂၀၀၉) ခုနှစ်အတွင်း စွမ်းရည်မြှင့်တင်သည့် အလုပ်ရုံဆွေးနွေးပွဲများကို “ Triple-A approach –Assess, Analyze, Action” ဟု A  (၃) လုံးဖြင့် ဆောင်ရွက်ခဲ့ပါကြောင်း၊ (၂၀၁၆-၂၀၁၇) ခုနှစ်အတွင်း ဖွားသေစာရင်းအင်းလက်စွဲစာစောင်များကို နိုင်ငံတစ်ဝှမ်းဖြန့်ဝေသုံးစွဲစေပြီး အတည်ပြုခဲ့ပါကြောင်း၊ ၂၀၁၄ ခုနှစ် ၊ ၂၀၁၅ ခုနှစ်နှင့် ၂၀၁၈ ခုနှစ်တို့တွင် မွန်၊ ချင်း၊ ကရင်၊ ကယား၊  ရှမ်း(တောင်)၊ မကွေး၊ ဧရာဝတီ၊ နေပြည်တော်ကောင်စီနှင့် တနင်္သာရီဧရိယာ (၉) ခု တွင် ကလေးပေါင်း (၄၅၀၀၀၀) အား Campaign များပြုလုပ်၍ မှတ်ပုံတင်ပေးခဲ့ပါကြောင်း ပြောကြားခဲ့ပါသည်။

ထို့နောက် UNICEF မှ လူမှုရေးနှင့်မူဝါဒပညာရှင် ဒေါ်ဂျီလီယံစန်းစန်းအေးနှင့် တယ်လီနောမြန်မာမှ အမှုဆောင်အရာရှိချုပ် Mr. Sharad Mehrotra တို့မှ “Introduction to the Mobile Birth and Death Registration Project in Mon State” ခေါင်းစဉ်ဖြင့် Presentation ပြုလုပ်ခဲ့ကြပါသည်။

ဆက်လက်၍ မွေးမှတ်ပုံတင်ပေးခြင်းနှင့် ပတ်သက်၍ ကလေးသူငယ်များနှင့် ဆယ်ကျော် သက်လူငယ်များ၏အသံ “Child and youth voices on Birth Registration for us” ခေါင်းစဉ်ဖြင့် U-Reporter အဖွဲ့မှ Presentation ပြုလုပ်တင်ဆက်ခဲ့ကြပါသည်။

ထို့နောက် Parallel Sessions ကို ဒေါက်တာအောင်ထွန်းသက်မှ ဦးဆောင်၍ “Leave no one behind” ခေါင်းစဉ်ဖြင့် ဆက်လက်ပြုလုပ်ရာ ပြည်သူ့အင်အားဦးစီးဌာနမှ ခေတ္တ ညွှန်ကြားရေးမှူးချုပ် ဒေါက်တာညီညီမှ  “Reducing inequalities in Myanmar in the SDG era” ခေါင်းစဉ်ဖြင့်လည်းကောင်း၊ ဗဟိုစာရင်းအင်းအဖွဲ့ ဒုတိယညွှန်ကြားရေးမှူးချုပ် ဦးသန်းဇော်မှ “Strengthening routine administrative data collection and reporting in Myanmar” ခေါင်းစဉ်ဖြင့်လည်းကောင်း၊ UNICEF မှ Child Protection Specialist, Ms. Grace Agcaoili မှ “SDG 16.9-Creating a modern  vital registration system for all” ခေါင်းစဉ်ဖြင့်လည်းကောင်း၊ Telenor Group မှ Head of Sustainability, Ms.MaiOldgard မှ “SDG 10- How can Telenor contribute to leaving no one behind” ခေါင်းစဉ်ဖြင့် အသီးသီးဆွေးနွေးခဲ့ကြပါသည်။

အဆိုပါအခမ်းအနားသည် မြန်မာနိုင်ငံ၏ ဖွားသေမှတ်ပုံတင်ခြင်းလုပ်ငန်းကို နိုင်ငံတကာ အဆင့်အတန်းမီသောစနစ် ဖြစ်လာစေရန်အတွက် ဖွားသေစာရင်းအင်းများကို ကျန်းမာရေး ဝန်ထမ်းများက စာရွက်စာတမ်းများအသုံးပြုကာ ကောက်ယူနေသည့်စနစ်အား ဒစ်ဂျစ်တယ် စနစ်သို့ ပြောင်းလဲဆောင်ရွက်သွားရန်ရည်ရွယ်ပါသည်။ ၄င်းစီမံချက်အား UNICEF နှင့် Telenor အထောက်အပံ့ဖြင့်  မိုဘိုင်းနည်းပညာအသုံးပြု၍ Online မှတစ်ဆင့် ဖွားသေမှတ်ပုံတင်ခြင်းစနစ်ကို မွန်ပြည်နယ်တွင် စမ်းသပ်ဆောင်ရွက်သွားမည်  ဖြစ်ပါသည်။ (သတင်းစဉ်)

၂၀၁၈ ခုနှစ်၊ ဩဂုတ်လ ၂၇ ရက်