ရန်ကုန်၊  ဩဂုတ် ၁၄ 

အများပိုင်ကုမ္ပဏီများအနေဖြင့် အရင်းအနှီးဈေးကွက်မှတစ်ဆင့် အရင်းအနှီးရယူစုစည်းနိုင်စေရန် ရည်ရွယ်၍ ရန်ကုန်စတော့အိပ်ချိန်းတွင် မူလရှိပြီးစာရင်းဝင်ဈေးကွက်အပြင် နိုင်ငံတကာ စတော့အိပ်ချိန်းများကဲ့သို့ ဒုတိယဈေးကွက်အဖြစ် စာရင်းဝင်အကြိုဈေးကွက် (Pre listing Board-PLB) ကို တည်ထောင်ထားရှိပါသည်။

ယခုအခါ ရန်ကုန်စတော့အိပ်ချိန်း၏ဒုတိယဈေးကွက် (Pre – Listing Board – PLB) တွင် ပထမဆုံးမှတ်ပုံတင်စာရင်းဝင်ကုမ္ပဏီအဖြစ် မြန်မာ့လယ်ယာထွက်ကုန်နှင့် အထွေထွေဖွံ့ဖြိုးတိုးတက်ရေးအများပိုင်ကုမ္ပဏီလီမိတက် (Myanma Agricultural and General Development Public Co., Ltd – MAGDPL) သည် သတ်မှတ်အရည်အချင်းများပြည့်မီမှုကြောင့် ဝင်ရောက်လာပြီဖြစ်သည်။
အဆိုပါကုမ္ပဏီ ရန်ကုန်စတော့အိပ်ချိန်း၏ဒုတိယဈေးကွက်(PLB)တွင် မှတ်ပုံတင်စာရင်းဝင်သည့်အခမ်းအနားကို ယနေ့နံနက် ၉ နာရီတွင် ရန်ကုန်မြို့ အမှတ်၊၂၄-၂၆၊ဆူးလေဘုရားလမ်းရှိ ရန်ကုန်စတော့အိပ်ချိန်းခန်းမ၌ ကျင်းပရာ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ ဦးမင်းထွဋ်က တက်ရောက်ဂုဏ်ပြုအမှာစကားပြောကြားသည်။
ဒုတိယဝန်ကြီးနှင့် ကော်မရှင်ဥက္ကဋ္ဌက နိုင်ငံတကာတွင် အများပိုင်ကုမ္ပဏီများအနေဖြင့် လုပ်ငန်းတိုးချဲ့နိုင်ရေး အရင်းအနှီးများလိုအပ်သည့်အခါမှာ ဘဏ်မှငွေချေးယူသည့်နည်းလမ်း၊ ငွေချေးစာချုပ် ထုတ်ဝေသည့်နည်းလမ်း၊ အစုရှယ်ယာများဖိတ်ခေါ်၍ အရင်းအနှီးစုစည်းသည့်နည်းလမ်း စသည်တို့ကို ကျင့်သုံးလေ့ရှိကြောင်း၊ ဘဏ်မှငွေချေးယူသည့်နည်းလမ်းနှင့် ငွေချေးစာချုပ်များ ထုတ်ဝေခြင်းနည်းလမ်းများမှာ ကုမ္ပဏီအတွက် တိုက်ရိုက်ငွေချေးယူခြင်းဖြစ်ပြီး ကုမ္ပဏီက တာဝန်ယူ၍ ပေးဆပ်ရမည်ဖြစ်ကြောင်း၊ အစုရှယ်ယာထုတ်ဝေသည့်နည်းလမ်းမှာ အများပိုင်ကုမ္ပဏီအဖြစ် တည်ထောင်၍ အများပြည်သူ၏ အစုရှယ်ယာများအပါအဝင် အရင်းအနှီးတိုးပွားအောင်ဆောင်ရွက်ပြီး ပါဝင်ရင်းနှီးမြှုပ်နှံသူများ အကျိုးအမြတ်ရရှိစေရန် ဆောင်ရွက်ပေးရမည်ဖြစ်ကြောင်း၊ 
ယနေ့ မိမိတို့နိုင်ငံတွင် နိုင်ငံတကာကျင့်ထုံးများနှင့်အညီ အများပြည်သူကို အစုရှယ်ယာ ကမ်းလှမ်းရောင်းချပြီးလိုအပ်သည့်အရင်းအနှီးများရယူစုစည်းနိုင်သည့် အရင်းအနှီးဈေးကွက်တည်ထောင် ထားရှိပြီးဖြစ်ကြောင်း၊ အရင်းအနှီးဈေးကွက်ကိုထိန်းကျောင်းရန် ငွေချေးသက်သေခံလက်မှတ်များ လဲလှယ်ရောင်းဝယ်ရေး ဥပဒေ၊ နည်းဥပဒေ၊ လုပ်ထုံးလုပ်နည်းတွေ ထုတ်ပြန်ပြဋ္ဌာန်းပြီး ရန်ကုန်စတော့အိပ်ချိန်း တည်ထောင်ထားရှိကြောင်း၊ ပါဝင်ရောင်းဝယ်မည့်ငွေချေးသက်သေခံလက်မှတ် ကုမ္ပဏီများကို လိုင်စင်ခွင့်ပြုခြင်းများဆောင်ရွက်ခဲ့ပြီး သတ်မှတ်စံနှုန်းများနှင့်ကိုက်ညီသော အများပိုင်ကုမ္ပဏီများကို ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ (Listed Company) အဖြစ် ခွင့်ပြုပေးခဲ့ကြောင်း၊ နိုင်ငံတကာစတော့အိပ်ချိန်းများအနေဖြင့် ဝင်ရောက်လိုသည့်ကုမ္ပဏီများအတွက် စာရင်းဝင်စံသတ်မှတ်ချက် (Listing Criteria) များ သတ်မှတ်ပြီး ယင်းစံသတ်မှတ်ချက်များအလိုက် စတော့အိပ်ချိန်းဈေးကွက်တွင် အမျိုးအစားခွဲပြီး Main Board အပြင် ဒုတိယအဆင့် Board များထားရှိသည်ကို တွေ့ရမည်ဖြစ်ကြောင်း၊ YSX မှာလည်း ဒုတိယ Board အဖြစ် Pre-Listing Board ကို တည်ထောင်ထားပါကြောင်း၊
ရန်ကုန်စတော့အိပ်ချိန်းတွင်စာရင်းဝင်လိုသော်လည်း Main Board အတွက် သတ်မှတ်ထားသည့် စာရင်းဝင်စံသတ်မှတ်ချက်များမပြည့်မီသေးသဖြင့် ဝင်ခွင့်မရသေးသော အများပိုင်ကုမ္ပဏီများအတွက် ရန်ကုန်စတော့အိပ်ချိန်း၏ ဒုတိယဈေးကွက် Second Board အဖြစ် တည်ထောင်ထားသော အကြိုစာရင်းဝင်ဈေးကွက် (Pre listing Board-PLB) တွင် ဝင်ရောက်နိုင်ကြောင်း၊ PLB တွင် အတွေ့အကြုံများရယူပြီးမှ မူလဈေးကွက် (Main Board) ကို ဝင်ရောက်စာရင်းဝင်နိုင်ရေး ဆောင်ရွက်ခြင်းဖြင့် စာရင်းဝင်ကုမ္ပဏီများ ပိုမိုတိုးတက်လာပြီး ရင်းနှီးမြှုပ်နှံမှုအခွင့်အလမ်းများ ပိုမိုလာမည်ဖြစ်ကြောင်း၊ ယနေ့တွင် ရန်ကုန်စတော့အိပ်ချိန်း၏ဒုတိယဈေးကွက်ဖြစ်သော အကြိုစာရင်းဝင်ဈေးကွက် (Pre Listing Board – PLB) တွင် မြန်မာ့လယ်ယာထွက်ကုန်နှင့်အထွေထွေဖွံ့ဖြိုးတိုးတက်ရေး အများပိုင်ကုမ္ပဏီလီမိတက် (Myanma Agricultural and General Development Public Co., Ltd – MAGDPL) အား ပထမဆုံးမှတ်ပုံတင်စာရင်းဝင်ကုမ္ပဏီအဖြစ် စတင်လက်ခံသည့် အထိမ်းအမှတ်အခမ်းအနားနှင့်အတူ အစုရှယ်ယာများကိုပထမဆုံး စတင်အရောင်းအဝယ်ပြုလုပ်မည်ဖြစ်ပါကြောင်း၊
ယနေ့ MAGDPL ကုမ္ပဏီသည် PLB တွင် မှတ်ပုံတင်စာရင်းဝင်ဖြစ်လာသဖြင့် ရန်ကုန်စတော့အိပ်ချိန်းတွင် အစုရှယ်ယာအရောင်းအဝယ်လုပ်သည့်စာရင်းဝင်ကုမ္ပဏီ (၈) ခုနှင့် အကြိုစာရင်းဝင် ကုမ္ပဏီ (၁) ခုအထိ တိုးတက်ရောက်ရှိလာခဲ့ပြီဖြစ်ကြောင်း၊ မြန်မာ့လယ်ယာထွက်ကုန်နှင့် အထွေထွေဖွံ့ဖြိုးတိုးတက်ရေးအများပိုင်ကုမ္ပဏီလီမိတက် (MAGDPL) သည် Pre-Listing Board တွင် စာရင်းဝင်နိုင်ရန် ၂၀၂၄ခုနှစ်၊ ဖေဖော်ဝါရီလ ၅ ရက်တွင် ရန်ကုန်စတော့အိပ်ချိန်းသို့ စတင်လျှောက်ထားခဲ့ပြီး သတ်မှတ်စံနှုန်းများ၊ ငွေချေးသက်သေခံလက်မှတ်များစာရင်းတင်သွင်းခြင်းဆိုင်ရာ လုပ်ထုံးလုပ်နည်းများနှင့်အညီ လိုအပ်သည့်စိစစ်မှု၊ မေးမြန်းမှုများကို စနစ်တကျခံယူခဲ့ကြောင်း၊ ရန်ကုန်စတော့အိပ်ချိန်းက စိစစ်ပြီးနောက် သတ်မှတ်စံနှုန်းများနဲ့ကိုက်ညီသည့်အတွက် မှတ်ပုံတင်ခွင့်ပြုရန်အတည်ပြုပေးနိုင်ရန် ကော်မရှင်သို့ တင်ပြခဲ့ရာ ၂၆-၄-၂၀၂၄ ရက်နေ့တွင် ကျင်းပခဲ့သော ကော်မရှင်၏ (၄/၂၀၂၄) ကြိမ်မြောက် အစည်းအဝေးမှ အတည်ပြုပေးခဲ့ကြောင်း၊ ရန်ကုန်စတော့အိပ်ချိန်း၏ Main Board တွင် စာရင်းဝင်ထားသောကုမ္ပဏီများတွင် လုပ်ငန်းနယ်ပယ်အစုံပါဝင်ပြီး ခိုင်မာတောင့်တင်းသည့် ကုမ္ပဏီကြီးများဖြစ်သည်ကို တွေ့နိုင်ပါကြောင်း၊ 
ကော်မရှင်အနေဖြင့် အရင်းအနှီးဈေးကွက်ဖွံ့ဖြိုးတိုးတက်စေရန် ရန်ကုန်စတော့အိပ်ချိန်း၊ ငွေချေးသက်သေခံလက်မှတ်ကုမ္ပဏီများ၊ စာရင်းဝင်ကုမ္ပဏီများကို ဥပ‌ဒေ၊ နည်းဥပဒေ၊ လုပ်ထုံးလုပ်နည်း များနှင့်အညီ ထိန်းကျောင်းကြပ်မတ်ပေးလျက်ရှိသဖြင့် အများပြည်သူများ ယုံကြည်စိတ်ချစွာဖြင့် ရေတိုရေရှည်ရင်းနှီးမြှုပ်နှံမှုပြုလုပ်လျက်ရှိသော ဈေးကွက်တစ်ခုဖြစ်ကြောင်း၊ ကော်မရှင်အနေဖြင့် တရားမဝင်ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုများအား ကြိုတင်ကာကွယ်ရေးဆိုင်ရာအမိန့်၊ ညွှန်ကြားချက်များကိုလည်းထုတ်ပြန်ခဲ့ပြီး ထိုအမိန့်ညွှန်ကြားချက်များကိုလိုက်နာဆောင်ရွက်ရန် ကြပ်မတ်ဆောင်ရွက်လျက်ရှိကြောင်း၊ 
ဆက်လက်၍ ရန်ကုန်စတော့အိပ်ချိန်း၊ ဒါရိုက်တာ ဒေါ်ဖြူဖြူဌေး မှ PLB တွင် မှတ်ပုံတင်စာရင်းဝင်ခြင်းလုပ်ငန်းစဉ်နှင့်စပ်လျဉ်း၍ အကျဉ်းချုပ်ပြောကြားကာ မြန်မာ့လယ်ယာထွက်ကုန်နှင့် အထွေထွေဖွံ့ဖြိုးတိုးတက်ရေး အများပိုင်ကုမ္ပဏီလီမိတက် ဥက္ကဋ္ဌ ဦးထွန်းလွင်မှ ကျေးဇူးတင်စကား ပြောကြားပါသည်။ 

ဆက်လက်၍ ရန်ကုန်စတော့အိပ်ချိန်းက မြန်မာ့လယ်ယာထွက်ကုန်နှင့်အထွေထွေဖွံ့ဖြိုး တိုးတက်ရေးအများပိုင်ကုမ္ပဏီလီမိတက်ဥက္ကဋ္ဌ ဦးထွန်းလွင်သို့ မှတ်ပုံတင်စာရင်းဝင်အသိအမှတ်ပြု လက်မှတ်ကိုပေးအပ်ခဲ့ပြီး မြန်မာ့လယ်ယာထွက်ကုန်နှင့်အထွေထွေဖွံ့ဖြိုးတိုးတက်ရေး အများပိုင်ကုမ္ပဏီလီမိတက်ဥက္ကဋ္ဌမှ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် ဥက္ကဋ္ဌ ဒုတိယဝန်ကြီးနှင့် ရန်ကုန်စတော့အိပ်ချိန်း၊ ဒါရိုက်တာ ဒေါ်ဖြူဖြူဌေး တို့သို့ အမှတ်တရဂုဏ်ပြုလက်ဆောင်များ ပေးအပ်ခဲ့ပါသည်။ 
ဆက်လက်၍ အစီအစဉ်အရ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့်ငွေချေး သက်သေခံလက်မှတ်လုပ်ငန်းကြီးကြပ်ရေးကော်မရှင်ဥက္ကဋ္ဌ ဦးမင်းထွဋ်၊ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်အတွင်းရေးမှူး ဦးကြည်ဇင်ထွန်း၊ ရန်ကုန်စတော့အိပ်ချိန်းဒါရိုက်တာ ဒေါ်ဖြူဖြူဌေး၊ မြန်မာ့လယ်ယာထွက်ကုန်နှင့်အထွေထွေဖွံ့ဖြိုးတိုးတက်ရေး အများနှင့်သက်ဆိုင်သော ကုမ္ပဏီလီမိတက် ဥက္ကဋ္ဌ ဦးထွန်းလွင်နှင့် မန်နေဂျင်းဒါရိုက်တာ ဒေါက်တာ မောင်မောင်အေးတို့က ရန်ကုန်စတော့အိပ်ချိန်းတွင် မှတ်ပုံတင်စာရင်းဝင်ခြင်းအထိမ်းအမှတ် အောင်ဇေယျတုခေါင်းလောင်းကို တီးခတ်ကြသည်။ 
အဆိုပါအခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီးနှင့် ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင် ဥက္ကဋ္ဌ ဦးမင်းထွဋ်၊ ရန်ကုန်တိုင်းဒေသကြီး အစိုးရအဖွဲ့၊ စီးပွားရေးရာဝန်ကြီး ဦးမျိုးမြင့်အောင်၊ သီလဝါအထူးစီးပွားရေးဇုန်စီမံခန့်ခွဲမှုကော်မတီ ဥက္ကဋ္ဌ ဦးရန်နိုင်ထွန်း၊ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်အဖွဲ့ဝင်များ၊ စီမံကိန်းနှင့်ဘဏ္ဍာရေးဝန်ကြီးဌာနမှအကြီးအကဲများ၊ ရန်ကုန်စတော့အိပ်ချိန်းဒါရိုက်တာအဖွဲ့ဝင်များ၊ ငွေချေးသက်သေခံလက်မှတ်ကုမ္ပဏီများနှင့် စာရင်းဝင်ကုမ္ပဏီများမှတာဝန်ရှိသူများ၊ မြန်မာ့လယ်ယာထွက်ကုန်နှင့်အထွေထွေဖွံ့ဖြိုးတိုးတက်ရေးအများပိုင်ကုမ္ပဏီလီမိတက် ဥက္ကဋ္ဌ ဦးထွန်းလွင် နှင့် ဒါရိုက်တာအဖွဲ့ဝင်များ၊ ရင်းနှီးမြှုပ်နှံသူများ တက်ရောက်ကြကြောင်း သတင်းရရှိသည်။
    
သတင်းစဉ်