နေပြည်တော် နိုဝင်ဘာ ၇

အမျိုးသားယာဉ်အန္တရာယ်၊ လမ်းအန္တရာယ်ကင်းရှင်းရေးဆိုင်ရာ ဘဏ္ဍာရေးဆပ်ကော်မတီ၏ ပထမအကြိမ်လုပ်ငန်းညှိနှိုင်းအစည်းအဝေးကို ယနေ့နံနက်ပိုင်းတွင် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးရုံး၊ အစည်းအဝေးခန်းမ၌ ကျင်းပသည်။

အစည်းအဝေးတွင်  ကော်မတီဥက္ကဌ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက အဖွင့်အမှာစကားပြောကြားရာ၌ မြန်မာနိုင်ငံအတွင်း ယာဉ်မတော်တဆထိခိုက်မှု အန္တရာယ်ကြောင့် ပြည်သူတို့၏ အသက်နှင့် လူမှုစီးပွားဘဝဆုံးရှုံးမှုများ၊ ထိခိုက်ဒဏ်ရာရမှုများ၊ ယာဉ်ကြောင့်ဖြစ်ပေါ်သော သဘာဝပတ်ဝန်းကျင်ထိခိုက်မှုများနှင့် ယာဉ်ကြောပိတ်ဆို့မှုများ လျော့နည်းကျဆင်းလာစေရေး အကောင်အထည်ဖော်ဆောင်ရွက်နိုင်ရန်အတွက် “အမျိုးသားယာဉ်အန္တရာယ်၊ လမ်း အန္တရာယ်ကင်းရှင်းရေးကောင်စီ (National Road Safety Council – NRSC)” ကို နိုင်ငံတော်စီမံအုပ် ချုပ်ရေးကောင်စီ၏ ၂၅-၂-၂၀၂၃ ရက်စွဲပါ အမိန့်ကြော်ငြာစာအမှတ်၊ ၆၆/၂၀၂၃ ဖြင့် ပြင်ဆင်ဖွဲ့စည်းခဲ့ ပြီးဖြစ်ပါကြောင်း၊ ကောင်စီ၏လုပ်ငန်းများ ထိရောက်စွာဆောင်ရွက်နိုင်ရန်အတွက် စီမံခန့်ခွဲရေးဆပ် ကော်မတီ၊ ပညာပေးရေးနှင့် စစ်ဆေးအရေးယူရေးဆပ်ကော်မတီ၊ သုတေသနပြုရေးနှင့် ကျန်းမာရေး ဆပ်ကော်မတီနှင့် ဘဏ္ဍာရေးဆပ်ကော်မတီဟူ၍ ဆပ်ကော်မတီ (၄) ခု ဖွဲ့စည်းလျက် ဆောင်ရွက်လျက် ရှိပါကြောင်း။

ဘဏ္ဍာရေးဆပ်ကော်မတီအနေဖြင့် ယာဉ်အန္တရာယ်၊ လမ်းအန္တရာယ်ကင်းရှင်းရေးဆိုင်ရာ လုပ်ငန်းစီမံချက်ကို အောင်မြင်စွာအကောင်အထည်ဖော်ဆောင်ရွက်နိုင်ရေးအတွက် ရန်ပုံငွေထူထောင်ရေး ကိစ္စပါရှိကြောင်း၊ ရန်ပုံငွေထူထောင်ရေးအတွက် နိုင်ငံတော်မှထည့်ဝင်ငွေအပြင် အပြည်ပြည်ဆိုင်ရာ အဖွဲ့အစည်းများ၊ ဒေသဆိုင်ရာအဖွဲ့အစည်းများ၊ ပြည်တွင်းပြည်ပမှ စေတနာရှင်များ၊ လူမှုအဖွဲ့အစည်းများနှင့် အစိုးရမဟုတ်သောအဖွဲ့အစည်းများ၏ ထောက်ပံ့ငွေများနှင့် လှူဒါန်းငွေများ ရရှိနိုင်မည့်အခြေအနေများနှင့်နည်းလမ်းများ၊ ရရှိသည့်ဘဏ္ဍာငွေများဖြင့် လုပ်ငန်းများဆောင်ရွက်ရာတွင် အလေအလွင့်မရှိစေရေး၊ ဘဏ္ဍာရေးစည်းမျဉ်းစည်းကမ်း၊ လုပ်ထုံးလုပ်နည်းများနှင့်အညီ စနစ်တကျသုံးစွဲရေးတို့ကို ကြီးကြပ်ဆောင်ရွက်သွားရမည်ဖြစ်ပါကြောင်း။ 

ယာဉ်အန္တရာယ်ကင်းရှင်းရေးရန်ပုံငွေ မထူထောင်နိုင်သေးမီကာလအတွင်း ယာဉ်အန္တရာယ်၊ လမ်းအန္တရာယ်ကင်းရှင်းရေးလုပ်ငန်းစီမံချက်ကို အကောင်အထည်ဖော်ဆောင်ရွက်နေသည့် သက်ဆိုင် ရာဝန်ကြီးဌာနများအနေဖြင့် ယာဉ်အန္တရာယ်၊ လမ်းအန္တရာယ်ကင်းရှင်းရေးဆိုင်ရာကိစ္စရပ်များအတွက် သင့်လျော်သည့် အသုံးစရိတ်ပမာဏကို မိမိတို့ဆောင်ရွက်ရမည့်ကဏ္ဍအလိုက် ဘတ်ဂျက်တွင် ထည့်သွင်းလျာထား၍ ဆောင်ရွက်ပေးလျက်ရှိပါကြောင်း။

သို့ဖြစ်ရာ ယနေ့အစည်းအဝေးတွင် ရန်ပုံငွေထူထောင်နိုင်မည့်နည်းလမ်းများ၊ ရန်ပုံငွေရရှိနိုင်မည့် နည်းလမ်းများ၊ ရန်ပုံငွေများကို စနစ်တကျထိရောက်စွာသုံးစွဲနိုင်ရေး အတွက် ကြီးကြပ်ဆောင်ရွက်မည့် နည်းလမ်းများနှင့် ယာဉ်စည်းကမ်း၊ လမ်းစည်းကမ်းဖောက်ဖျက်သူများကိုတပ်ရိုက်သည့် ဒဏ်ကြေးငွေ များကို ရငွေစာရင်းသို့ထည့်သွင်းခြင်းကိစ္စရပ်များကို ဝိုင်းဝန်းဆွေးနွေးပေးကြရန် ဖြစ်ပါကြောင်း ပြောကြားသည်။

ထို့နောက် အစည်းအဝေးသို့ တက်ရောက်လာကြသော ကော်မတီအဖွဲ့ဝင်များဖြစ်ကြသည့် ကျန်းမာရေးဝန်ကြီးဌာနနှင့် ဆောက်လုပ်ရေးဝန်ကြီးဌာနတို့မှ ဒုတိယဝန်ကြီးများ၊ နေပြည်တော်ဒုတိယ မြို့တော်ဝန်၊ ရန်ကုန်မြို့တော်ဝန်၊ မန္တလေးမြို့တော်ဝန်၊ မြန်မာနိုင်ငံရဲတပ်ဖွဲ့၊ ရဲချုပ်နှင့် ဌာနဆိုင်ရာ အကြီးအကဲများ၊ မြန်မာနိုင်ငံကုန်သည်ကြီးများနှင့် စက်မှု၊ လက်မှုလုပ်ငန်းရှင်များအသင်းချုပ်၊ ဥက္ကဋ္ဌ တို့က သက်ဆိုင်ရာကဏ္ဍအလိုက်ဝိုင်းဝန်းအကြံပြုဆွေးနွေးတင်ပြကြပြီး၊ကော်မတီဥက္ကဋ္ဌ ဒုတိယဝန်ကြီး ဦးမောင်မောင်ဝင်းက ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။  
သတင်းစဉ်