နေပြည်တော် ၊ ဩဂုတ် ၂၆ 

စီမံကိန်းနှင့်ဘဏ္ဍာရေးဝန်ကြီးဌာန၏ ၂၀၂၃ ခုနှစ်၊ ဝါဆိုသင်္ကန်းဆက်ကပ်လှူဒါန်းပွဲ အခမ်းအနားကို  ယနေ့နံနက် (၀၉:၃၀) နာရီတွင် နေပြည်တော်၊ ရုံးအမှတ် (၃၄) ရှိ စီမံကိန်းနှင့် ဘဏ္ဍာရေးဝန်ကြီးဌာန၊ စုပေါင်းအစည်းအဝေးခန်းမ၌ကျင်းပရာ စီမံကိန်းနှင့်ဘဏ္ဍာရေးဝန်ကြီး ဌာန၊ ဒုတိယဝန်ကြီး ဦးမောင်မောင်ဝင်း တက်ရောက်ကြည်ညိုပြီး ဝါဆိုသင်္ကန်းနှင့် လှူဖွယ် ပစ္စည်းများ ဆက်ကပ်လှူဒါန်းသည်။ 

အခမ်းအနားသို့ တပ်ကုန်းမြို့၊ မြို့ရှေ့ရွာဦးစန္ဒာရုံကျောင်းတိုက်၊ ဦးစီးပဓာန နာယက ဆရာတော် အဘိဓဇအဂ္ဂမဟာသဒ္ဓမ္မဇောတိက ဘဒ္ဒန္တစန္ဒသိရီအမှူးပြုသော ပင့်ဖိတ်ထားသည့် ဆရာတော်(၁၀)ပါး ကြွရောက်ချီးမြှင့်တော်မူကြပြီး၊ ဒုတိယဝန်ကြီး ဦးမောင်မောင်ဝင်းနှင့် ဒေါ်သန်းသန်းလင်း၊ ဝန်ကြီးဌာနအောက်ရှိ လုပ်ငန်း၊ အဖွဲ့အစည်းများ၊ ဦးစီးဌာနများမှ ဦးဆောင် ညွှန်ကြားရေးမှူးများနှင့် ညွန်ကြားရေးမှူးချုပ်များ၊ အရာထမ်း/အမှုထမ်းများ တက်ရောက် ကြသည်။

အခမ်းအနားတွင် တက်ရောက်လာကြသူများက ဘဒ္ဒန္တစန္ဒသိရီဆရာတော်ကြီးထံမှ ငါးပါး သီလခံယူဆောက်တည်ကြကာ ဆရာတော်ကြီးများ ရွတ်ပွားချီးမြှင့်တော်မူသည့် မေတ္တသုတ် ပရိတ်တရားတော်များကို နာယူကြည်ညိုကြပြီး၊ ဆရာတော်များထံ ဝါဆိုသင်္ကန်းနှင့် လှူဖွယ် ပစ္စည်းများကို ဆက်ကပ်လှူဒါန်းကြသည်။ 

ထို့နောက် ပရိသတ်များက ဆရာတော် ဘဒ္ဒန္တစန္ဒသိရီထံမှ အနုမောဒနာတရား နာယူကြ ပြီး၊ လှူဒါန်းမှုအစုစုတို့အတွက် ရေစက်သွန်းချ အမျှပေးဝေကြကာ ဗုဒ္ဓသာသနံစိရံတိဋ္ဌတု သုံးကြိမ်ရွတ်ဆို ဆုတောင်း၍ အခမ်းအနားကို ရုပ်သိမ်းလိုက်သည်။

အခမ်းအနားအပြီးတွင် ဒုတိယဝန်ကြီးများနှင့် အခမ်းအနား တက်ရောက်လာကြသူများ သည် ဆရာတော်၊ သံဃာတော်များအား နေ့ဆွမ်းဆက်ကပ်လှူဒါန်းခဲ့ကြောင်း သတင်းရရှိသည်။ 

                                                                     သတင်းစဉ်