စီမံကိန်းနှင့်ဘဏ္ဍာရေးဝန်ကြီးဌာန၊ အာမခံလုပ်ငန်းကြီးကြပ်ရေးအဖွဲ့၏ အကြိမ် (၃၀) မြောက် (ပုံမှန်) အစည်းအဝေး (၂/၂၀၂၂) ကို ရုံးအမှတ် (၂၆) ရှိ စီမံကိန်းနှင့်ဘဏ္ဍာရေးဝန်ကြီးဌာန၊ အစည်းအဝေး ခန်းမတွင် ၂၀၂၂ ခုနှစ် ၊ အောက်တိုဘာလ (၂၁) ရက် (သောကြာနေ့) နံနက် (၉:၀၀) နာရီတွင် ကျင်းပ ပြုလုပ်ခဲ့ပါသည်။

အဆိုပါအစည်းအဝေးသို့ အာမခံလုပ်ငန်းကြီးကြပ်ရေးအဖွဲ့ ဥက္ကဋ္ဌ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်း၊ အာမခံလုပ်ငန်းကြီးကြပ်ရေးအဖွဲ့ဝင်များ ဖြစ်ကြသော ဥပဒေရေးရာ ဝန်ကြီးဌာနနှင့် ပြည်ထောင်စုစာရင်းစစ်ချုပ်ရုံး၊ ပြည်တွင်းအခွန်များဦးစီးဌာန၊ မြန်မာနိုင်ငံတော် ဗဟိုဘဏ်၊ ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာနတို့မှ ညွှန်ကြားရေးမှူးချုပ်များနှင့်  အာမခံလုပ်ငန်းကြီးကြပ်ရေးအဖွဲ့၏ အတွင်းရေးမှူး၊ ငွေရေးကြေးရေးကြီးကြပ်စစ်ဆေးရေးဦးစီးဌာနမှ   ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်နှင့် အရာထမ်းများ တက်ရောက်ခဲ့ကြပါသည်။

အစည်းအဝေးတွင် အာမခံလုပ်ငန်းကြီးကြပ်ရေးအဖွဲ့ ဥက္ကဋ္ဌမှ အဖွင့်အမှာစကား ပြောကြားပြီး အတွင်းရေးမှူးမှ ယခင်အစည်းအဝေး (၂၉ ကြိမ်မြောက် ၁/၂၀၂၂ ) ၏ ဆောင်ရွက်ပြီးစီးမှုအား တင်ပြခဲ့ ပါသည်။

ဆက်လက်၍ လိုင်စင်ရအာမခံကုမ္ပဏီများဖြစ်သည့် CB Life Insurance Co., Ltd. မှ ဆေးရုံတက်ခြင်းနှင့် ခွဲစိတ်ကုသခြင်းအတွက် ထပ်ဆောင်းအကာအကွယ် အာမခံအမျိုးအစားသစ် လုပ်ကိုင်ခွင့်ပြုရန်၊ KBZ MS General Insurance Co.,Ltd မှ အသေးစား ကျန်းမာရေးအာမခံ အမျိုးအစားသစ် လုပ်ကိုင်ခွင့်ပြုရန်၊ Prudential Myanmar Life Insurance Limited မှ Step-up Wrapper Campaign ပြုလုပ်ခွင့်ရရှိရန်နှင့် First National Insurance General Co., Ltd. မှ FNI Marketing Counter ဖွင့်လှစ်ခွင့်ပြုရေး တင်ပြခဲ့ကြပါသည်။ ထို့နောက် ပြည်တွင်းအာမခံကုမ္ပဏီ လုပ်ငန်းလိုင်စင်ထုတ်ပေးရေးလုပ်ငန်းစဉ် ဆက်လက်ဆောင်ရွက်ခွင့်ပြုရန်ကိစ္စ၊ အာမခံလက်ခံခြင်းနှင့် မတည်ရင်းနှီးငွေတိုးမြှင့်ခြင်းကိစ္စ၊  ကော်ပိုရိတ်အာမခံကိုယ်စားလှယ် လျှောက်ထားခြင်းအား လိုင်စင် ထုတ်ပေးနိုင်ရေးကိစ္စ၊ အာမခံကိုယ်စားလှယ်သင်တန်းကျောင်း ဖွင့်လှစ်ခွင့်တင်ပြခြင်းကိစ္စနှင့် မှတ်တမ်း တင်ရန် ကိစ္စရပ်များကို ဆွေးနွေးခဲ့ကြပြီး အစည်းအဝေးကို နံနက် (၁၁:၄၀) နာရီတွင် ရုပ်သိမ်းခဲ့သည်။

ယခုအခါ မြန်မာနိုင်ငံ၏ အာမခံလုပ်ငန်းကဏ္ဍတွင် ရာနှုန်းပြည့်နိုင်ငံခြားသားပိုင် အသက်အာမခံကုမ္ပဏီ (၅) ခု၊ ဖက်စပ်အသက်အာမခံကုမ္ပဏီ (၃) ခု၊ နိုင်ငံသားပိုင်အသက်အာမခံကုမ္ပဏီ (၈) ခု၊ ဖက်စပ် အထွေထွေ အာမခံကုမ္ပဏီ (၃) ခု၊ နိုင်ငံသားပိုင် အထွေထွေအာမခံကုမ္ပဏီ (၅) ခုနှင့် မြန်မာ့အာမခံလုပ်ငန်းအပါအဝင် အာမခံကုမ္ပဏီ (၂၅) ခုမှ အာမခံဝန်ဆောင်မှုများ ဆောင်ရွက်ပေးလျက်ရှိပြီး လက်ရှိတွင် ပုဂ္ဂလိက အာမခံကုမ္ပဏီများမှ အာမခံအမျိုးအစား (၃၉) မျိုးကို ဝန်ဆောင်မှုပေးလျက်ရှိကြောင်း သိရှိရသည်။                                                                                                                                                                                                                                  

   သတင်းစဉ်