စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်သည် ယနေ့နံနက် (၉:၀၀) နာရီတွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်သူ့ဘဏ္ဍာရေးစီမံခန့်ခွဲမှု သင်တန်းကျောင်း၌ကျင်းပပြုလုပ်သော ဩစတြေးလျနှင့်ကိုရီးယားသမ္မတနိုင်ငံများရှိ တက္ကသိုလ်များတွင် ဖွင့်လှစ်ပို့ချခဲ့သော မဟာဘွဲ့သင်တန်းများသို့ အောင်မြင်စွာတက်ရောက်ခဲ့ကြသည့် ပြည်တွင်းအခွန်များဦးစီးဌာနနှင့် ရသုံးမှန်းခြေငွေစာရင်းဦးစီးဌာနတို့မှ အရာထမ်းနှစ်ဦးတို့က ၎င်းတို့၏ လေ့လာသင်ကြားမှုအတွေ့အကြုံများ ဆွေးနွေးဖလှယ်သည့်အခမ်းအနားသို့ တက်ရောက်ပါသည်။

စီမံကိန်းနှင့်ဘဏ္ဍာရေးဝန်ကြီးဌာနသည် လူ့စွမ်းအားအရင်းအမြစ်ဖွံ့ဖြိုးတိုးတက်ရန် ရည်ရွယ်ပြီး၊ အရည်အချင်းပြည့်ဝသည့်ဝန်ထမ်းများအားစိစစ်၍ ပြည်ပသို့ ပညာတော်သင်များစေလွှတ်ခြင်း၊ ပြန်လည်ရောက်ရှိသည့်အခါတွင်လည်း သင်ယူလေ့လာရရှိခဲ့သည့် ပညာရပ်ဆိုင်ရာ ဆည်းပူးလေ့လာမှု အတွေ့အကြုံများကို ပြန်လည်မျှဝေခြင်း၊ လက်တွေ့လုပ်ငန်းနယ်ပယ်များတွင် ပေါင်းစပ်အသုံးချခြင်းတို့ကို စဉ်ဆက်မပြတ်ဆောင်ရွက်လျက်ရှိရာ ယနေ့ကျင်းပပြုလုပ်သည့်အစီအစဉ်သည် ယင်းသို့ဆောင်ရွက်မှုများအနက် အစီအစဉ်တစ်ခုဖြစ်ပါသည်။ စီမံကိန်းနှင့်ဘဏ္ဍာရေးဝန်ကြီးဌာနအနေဖြင့် ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း တည်ထောင်ဖွင့်လှစ်၍ ဝန်ထမ်းများအတွက် ဘာသာရပ်ဆိုင်ရာအလုပ်ရုံဆွေးနွေးပွဲများ၊ လုပ်ငန်းခွင်ကျွမ်းကျင်မှုသင်တန်းများ၊ ဗဟု သုတမျှဝေခြင်းအစီအစဉ်များကို စီစဉ်ဆောင်ရွက်လျက်ရှိပါသည်။

ယနေ့အခမ်းအနားတွင် ပညာတော်သင်များက ပညာသင်ကာလအတွင်းလေ့လာဆည်းပူးခဲ့သည့် ဘာသာရပ်များ၊ သင်ကြားပို့ချမှုအတွေ့အကြုံများ၊ သုတေသနပြုလေ့လာမှုများ၊ စာတမ်းပြုစုရေးသားမှုအခြေအနေများနှင့် မြန်မာနိုင်ငံတွင် လက်တွေ့ကျင့်သုံးဆောင်ရွက်မှုများကို ရှင်းလင်းတင်ပြခဲ့ကြပြီး တက်ရောက်လာကြသူများ၏ မေးမြန်းဆွေးနွေးချက်များကို ပညာတော်သင်များက ပြန်လည်ရှင်းလင်းဆွေးနွေးကြပါသည်။

ထို့နောက် ပြည်ထောင်စုဝန်ကြီးကဆွေးနွေးရာတွင် မိမိတို့နိုင်ငံသည်ဖွံ့ဖြိုးဆဲနိုင်ငံတစ်နိုင်ငံဖြစ်၍ လူသားအရင်းအမြစ်ဖွံ့ဖြိုးတိုးတက်မှုကို ဦးစားပေးဆောင်ရွက်ရန် လိုအပ်နေကြောင်း၊ သို့ဖြစ်ရာ ဝန်ကြီးဌာနအနေဖြင့် လူ့စွမ်းအားအရင်းအမြစ်ဖွံ့ဖြိုးတိုးတက်စေရေးကို အထူးအလေးထား၍ ပညာတော်သင်များကို စဉ်ဆက်မပြတ် စေလွှတ်ပေးလျက်ရှိကြောင်း၊ ပညာတော်သင်များ အနေဖြင့်လည်း ရရှိလာသည့်အခွင့်အရေးကိုအကျိုးရှိရှိအသုံးချ၍ သင်ယူလေ့လာကြရန်နှင့် သင်ယူရရှိလာသည့် အတွေ့အကြုံများကိုလည်း ဌာနတွင်ပြန်လည်မျှဝေခြင်းများ၊ လက်တွေ့လုပ်ငန်းနယ်ပယ်များတွင် ပေါင်းစပ်အသုံးပြုခြင်းများဖြင့် ဌာနအတွက် ပြန်လည်အကျိုးပြုဆောင်ရွက်ကြရန်လိုကြောင်း ပြောကြားပါသည်။
ယနေ့ဆွေးနွေးပွဲသို့ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီးများဖြစ်ကြသော ဦးမောင်မောင်ဝင်းနှင့် ဒေါ်သန်းသန်းလင်း၊ သက်ဆိုင်ရာဌာနအကြီးအကဲများ၊ အဆင့်မြင့်အရာထမ်းများနှင့် ဝန်ထမ်းများ တက်ရောက်ခဲ့ကြကြောင်း သတင်းရရှိပါသည်။ (သတင်းစဉ်)

နေပြည်တော်၊ မတ် ၂၈