နေပြည်တော်၊ စက်တင်ဘာလ ၂၀

စဉ်ဆက်မပြတ်ဖွံ့ဖြိုးမှုပန်းတိုင်များ ပြည့်မီစေရန် အရှိန်မြှင့်တင်ဆောင်ရွက်ရေး အာဆီယံဝန်ကြီးများဆွေးနွေးပွဲကို ယနေ့၊ မွန်းလွဲပိုင်းတွင် Video Conference စနစ်ဖြင့် ကျင်းပခဲ့ရာ အာဆီယံအဖွဲ့ဝင်နိုင်ငံများမှ ဖွံ့ဖြိုးတိုးတက်ရေးစီမံကိန်းဝန်ကြီးဌာနဝန်ကြီးများ၊ အာဆီယံအတွင်းရေးမှူးချုပ်နှင့် တာဝန်ရှိသူများနှင့်အတူ စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန် တက်ရောက်ခဲ့ပါသည်။

ဆွေးနွေးပွဲအစီအစဉ်အရ အင်ဒိုနီးရှားနိုင်ငံ၊ အမျိုးသားဖွံ့ဖြိုးတိုးတက်ရေးစီမံကိန်း ဝန်ကြီး H. E. Suharso Monoarfa ၊ ကမ္ဘောဒီးယားနိုင်ငံ၊ စီမံကိန်းဝန်ကြီး H. E. Kitti Settha Pandita Chhay Than ၊ ဖိလစ်ပိုင်နိုင်ငံ၊ အမျိုးသားစီးပွားရေးနှင့် ဖွံ့ဖြိုးတိုးတက်ရေးဝန်ကြီးဌာန၊ ဒုတိယဝန်ကြီး H. E. Rosemarie G. Edillon နှင့် အာဆီယံ အထွေထွေ အတွင်းရေးမှူးချုပ် H. E. Dato Lim Jock Hoi တို့က နှုတ်ခွန်းဆက် အမှာစကားများ ပြောကြားခဲ့ကြပါသည်။

ထို့နောက် အာဆီယံအဖွဲ့ဝင်နိုင်ငံများ၏ ဖွံ့ဖြိုးတိုးတက်ရေးစီမံကိန်းဝန်ကြီးဌာန ဝန်ကြီးများက ဒေသတွင်း စဉ်ဆက်မပြတ်ဖွံ့ဖြိုးမှုပန်းတိုင်များ (Sustainable Develop-ment Goals-SDGs) အကောင်အထည်ဖော်ရေး၊ ကိုဗစ်-၁၉ ၏ ဆိုးကျိုးသက်ရောက်မှုများ လျော့နည်းစေရေး၊ ဖွံ့ဖြိုးတိုးတက်ရေး စီမံကိန်းဝန်ကြီးဌာနများနှင့် ဖွံ့ဖြိုးမှု မိတ်ဖက်များအကြား ပူးပေါင်းဆောင်ရွက်မှုများ ခိုင်မာအားကောင်းစေရေးနှင့် ဖွံ့ဖြိုးတိုးတက်ရေးတို့အတွက် စီမံကိန်းဝန်ကြီးဌာနများက အာဆီယံ၏လုပ်ငန်းစဉ်များတွင် ပံ့ပိုးပေးနိုင်မည့် အခန်းကဏ္ဍတို့နှင့်စပ်လျဉ်း၍  ဆွေးနွေးကြပါသည်။ 

ဆွေးနွေးပွဲတွင် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန် က ကိုဗစ် - ၁၉ မတိုင်မီကာလက အာဆီယံ၏ စီးပွားရေးဖွံ့ဖြိုးမှုသည် တည်ငြိမ်လျက်ရှိပြီး ဒေသတွင်းအဓိကကျသည့် အဖွဲ့အစည်းအဖြစ်ရပ်တည်လျက်ရှိပါကြောင်း၊ ပြီးခဲ့သည့် (၂) နှစ်အတွင်း အာဆီယံအပါအဝင် တစ်ကမ္ဘာလုံးသည် ကိုဗစ်-၁၉ ၏ သက်ရောက်မှုများကို ခံစားခဲ့ရပါကြောင်း၊ SDG ပန်းတိုင်များ အားလုံးနီးပါးသည်လည်း ကိုဗစ်-၁၉ ၏ သက်ရောက်မှုများကို ခံစားခဲ့ရသည့်အတွက် နိုင်ငံတစ်ခုချင်းစီနှင့် ဒေသတွင်းတွင် ရေးဆွဲထားသည့် မဟာဗျူဟာများကို လက်တွေ့အကောင်အထည်ဖော်ရန် လိုအပ်လာပါကြောင်း၊ အာဆီယံသည် ကိုဗစ်-၁၉ ကြောင့် သက်ရောက်မှုများကို ပြန်လည်ကုစားရန်အတွက် COVID -19 ASEAN Response Fund အပါအဝင် နည်းလမ်းအမျိုးမျိုးကို ၂၀၂၀ ပြည့်နှစ်၊ ဖေဖော်ဝါရီလမှစ၍ ချမှတ်အကောင်အထည်ဖော် ဆောင်ရွက်ခဲ့ပါကြောင်း၊ ကိုဗစ်-၁၉ ၏ သက်ရောက်မှုများကို လျှော့ချရန်အတွက် မြန်မာနိုင်ငံအပါအဝင် နိုင်ငံအများစုက ပြန်လည်ကုစားရေးအစီအမံများကို ရေးဆွဲခဲ့ပါကြောင်း၊ ရည်ရွယ်ချက်မှာ ကိုဗစ်-၁၉ ၏ သက်ရောက်မှုကို ခံစားနေရသည့် ပြည်သူများအား ကူညီထောက်ပံ့ရန်နှင့် အသေးစား၊ အလတ်စားနှင့် အငယ်စား စီးပွားရေးလုပ်ငန်းများ ဆက်လက်လည်ပတ်နိုင်စေရေးအတွက် ကူညီထောက်ပံ့ရန်ဖြစ်ပါကြောင်း၊ အဆိုပါစီမံချက်များတွင် ဒေသတွင်း၌ ကာကွယ်ဆေးထိုးနှံမှုနှုန်းမြင့်မားစေရန်၊ ကာကွယ်ဆေးထိုးနှံရန်အတွက် အခွင့်အရေး တန်းတူညီမျှရရှိစေရန်၊ အနာဂတ်အတွက် ပြည်သူ့ကျန်းမာရေး အရေးပေါ်စီမံချက်များ ရေးဆွဲရန်နှင့် နိုင်ငံများနှင့်ဒေသတွင်း ဦးစားပေးလုပ်ငန်းများကို အခြေခံ၍ ခံနိုင်ရည်ရှိသည့် စီးပွားရေးဝန်းကျင်တစ်ရပ် ဖန်တီးရန်လိုအပ်ပါကြောင်း၊ ယခုကဲ့သို့ ပြင်ပသက်ရောက်မှုများကို ခံနိုင်ရည်ရှိစေရန်အတွက် အာဆီယံအနေဖြင့် အနာဂတ်တွင် တရားဝင်ဖွံ့ဖြိုးမှုအကူအညီများကို တန်းတူညီမျှထောက်ပံ့ရန်၊ ဝင်ငွေနည်းပါးသည့် နိုင်ငံများ၏ ကြွေးမြီများကို လျော်ပေးရန်နှင့် ဝင်ငွေအလယ်အလတ်ရှိသည့် နိုင်ငံများ၏ ကြွေးမြီဝန်ထုပ်ဝန်ပိုးများကို ဖြေလျှော့ပေးရန် လိုအပ်ပါကြောင်း ပြောကြားပါသည်။ 

ထို့အပြင် SDGs ကို အကောင်အထည်ဖော် ဆောင်ရွက်ရာတွင် ASEAN Comprehensive Recovery Framework, Complementarities Roadmap 2020-2025, ASEAN Community Vision 2025, 2030 Agenda for SDG စသည်တို့ကို အခြေခံပြီး Reopening, Recovery and Resilience ဟူသည့် 3R Model ဖြင့် အကောင်အထည်ဖော် ဆောင်ရွက်ရန် လိုအပ်ပါကြောင်း၊ ထိုသို့အကောင်အထည်ဖော် ဆောင်ရွက်ရာတွင် ထိရောက်သည့်ရလဒ်များ ပေါ်ထွက်လာစေရေးအတွက် သက်ဆိုင်ရာ အာဆီယံ၏ ကဏ္ဍဆိုင်ရာအဖွဲ့များကို အားပေးကူညီရမည် ဖြစ်ပါကြောင်း၊ အာဆီယံ၏ ကဏ္ဍာဆိုင်ရာအဖွဲ့များအား သက်ဆိုင်ရာကဏ္ဍများအလိုက် အကောင်အထည်ဖော်မှုအခြေအနေကို စောင့်ကြည့်သုံးသပ်နိုင်ရန် တွန်းအားပေးဆောင်ရွက်မှသာ ထိရောက်ပြီး ထင်သာမြင်သာရှိသည့်ရလဒ်များလည်း ရရှိလာမည်ဖြစ်ပါကြောင်း၊  SDG ကို အကောင်အထည်ဖော် ဆောင်ရွက်ရာတွင် ရင်းနှီးမြှုပ်နှံမှုများ တိုးမြှင့်ရရှိရန်အတွက် အစိုးရ၊ ပုဂ္ဂလိကကဏ္ဍ၊ နိုင်ငံတကာမှ ဖွံ့ဖြိုးမှုမိတ်ဖက်များ၏ အခန်းကဏ္ဍသည် အလွန်အရေးပါကြောင်း၊ ထို့ကြောင့် ပူးပေါင်း ဆောင်ရွက်မှုများကို မြှင့်တင်ရန်လိုအပ်ပါကြောင်း ပြောကြားပါသည်။

ပြည်သူ့ဝန်ဆောင်မှုလုပ်ငန်းများနှင့် SDG အကောင်အထည်ဖော်ရေးအတွက် ပုဂ္ဂလိကကဏ္ဍမှ ရင်းနှီးမြှုပ်နှံမှုတိုးမြင့်နိုင်ရေးကိုဆောင်ရွက်ရာတွင် အစိုးရသာမက ဖွံ့ဖြိုးမှုမိတ်ဖက်များနှင့် ပုဂ္ဂလိကကဏ္ဍများသည် အရေးပါသောအခန်းကဏ္ဍမှ ပါဝင်နေပါကြောင်း၊ မိမိတို့အနေဖြင့် SDG အတွက် ရင်းနှီးမြှုပ်နှံမှုပြုလုပ်နိုင်မည့် လုပ်ငန်း ရှင်ကြီးများကို နည်းလမ်းမျိုးစုံဖြင့် မက်လုံးပေးနိုင်ရန်ကိုလည်း စဉ်းစားရမည်ဖြစ်ပါကြောင်း၊ သို့ဖြစ်၍ ချိတ်ဆက်မှုနှင့် ပူးပေါင်းဆောင်ရွက်မှုများ တိုးမြှင့်နိုင်ရေးတို့အတွက် လက်တွေ့ဆောင်ရွက်နိုင်မည့်ကိစ္စရပ်များကိုလည်း ဖော်ထုတ်ပေးရမည်ဖြစ်ပါကြောင်း ပြောကြားပါသည်။ 

ဆက်လက်၍ ပြည်ထောင်စုဝန်ကြီးက ပြောကြားရာတွင် ယခုအခါ မြန်မာနိုင်ငံအနေဖြင့် စဉ်ဆက်မပြတ်ဖွံ့ဖြိုးမှုပန်းတိုင်များ (SDGs) ရရှိအောင် အထူးအလေးထား ဆောင်ရွက်လျက်ရှိပါကြောင်း၊  SDGs ကို အကောင်အထည်ဖော်ခြင်းနှင့်အတူ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း
(Myanmar Sustainable Development Plan-MSDP) ကို အကောင်အထည်ဖော်လျက် ရှိပါကြောင်း၊ MSDP သည် SDGs နှင့်သာမက မဲခေါင်ဒေသတွင်းမဟာဗျူဟာမူဘောင်၊ အာဆီယံစီးပွားရေးအသိုက်အဝန်းနှင့် အခြားသော ဒေသတွင်းကတိကဝတ်များနှင့်လည်း ကိုက်ညီမှုရှိပါကြောင်း၊ SDG လုပ်ငန်းစဉ်များ အကောင်အထည်ဖော်ဆောင်ရွက်နိုင်ရန် ငွေကြေး ထောက်ပံ့မှုနည်းလမ်းမျိုးစုံဖြင့် ဆောင်ရွက်လျက်ရှိပါကြောင်း၊ MSDP ကို အကောင်အထည်ဖော်ရာတွင် စောင့်ကြည့်အကဲဖြတ်နိုင်ရေးအတွက် အမျိုးသားညွှန်ကိန်းမူဘောင် (National Indicator Framework – NIF) ကိုလည်း ရေးဆွဲထားပြီးဖြစ်ပါကြောင်း ပြောကြားပါသည်။

ဆက်လက်၍ ပြည်ထောင်စုဝန်ကြီးက မြန်မာနိုင်ငံအနေဖြင့် ကိုဗစ် -၁၉ ကြောင့် စီးပွားရေးထိခိုက်မှုများကို ပြန်လည်ကုစားရန်အတွက် မြန်မာနိုင်ငံစီးပွားရေး ပြန်လည်ဦးမော့စေရေးစီမံချက် (Myanmar Economic Relief Plan - MERP) ကို ရေးဆွဲထားပါကြောင်း၊ အဆိုပါ စီမံချက်သည် စီးပွားရေးလုပ်ငန်းများ ပြန်လည်ကောင်းမွန်လာရေး၊ ပြည်တွင်းပြည်ပ ရင်းနှီးမြှုပ်နှံမှုများကို ဖိတ်ခေါ်ရေး၊ စီးပွားရေးလုပ်ငန်းများ ဆောင်ရွက်ရာတွင် လွယ်ကူချောမွေ့စေရေး၊ ဥပဒေအရ အကာအကွယ်ပေးရေးတို့ကို ဦးတည်ပါကြောင်း၊ အဆိုပါစီမံကိန်းသည် နှစ်လတ်စီမံကိန်းဖြစ်ပြီး မြန်မာနိုင်ငံ၏ ရေရှည်တည်တံ့ ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း၊ အာဆီယံ၏ ဘက်စုံပြန်လည်ထူထောင်ရေးမူဘောင် (ASEAN Comprehensive Recovery Framework)  နှင့် GMS ကိုဗစ် ၁၉ တုန့်ပြန်မှုနှင့် ပြန်လည်ထူထောင်ရေး စီမံကိန်းတို့နှင့် ချိတ်ဆက်ထားပါကြောင်း ပြောကြားပါသည်။ 

ပြည်ထောင်စုဝန်ကြီးက ဆက်လက်ပြောကြားရာတွင် အာဆီယံအဖွဲ့ဝင်နိုင်ငံများ၏ ဖွံ့ဖြိုးမှုစီမံကိန်းများ ပိုမိုအားကောင်းလာစေရေးအတွက် အာဆီယံအနေဖြင့်ဖွံ့ဖြိုးမှု စီမံကိန်းဆိုင်ရာ အာဆီယံအဆင့်မြင့်အရာရှိကြီးများအစည်းအဝေးကို ပြန်လည်ဆောင်ရွက်စေပြီး၊ နိုင်ငံများ၏ဖွံ့ဖြိုးမှုစီမံကိန်းများနှင့် ဖြည့်စွက်အကောင်အထည်ဖော် ဆောင်ရွက်ရမည့် လမ်းပြမြေပုံ (Complementarities Roadmap 2020-2025) တို့အကြား ချိတ်ဆက်အကောင်အထည်ဖော်နိုင်ရေး တာဝန်ပေးဆောင်ရွက်သင့်ပါကြောင်း၊ အမျိုးသားစီမံကိန်းဖွံ့ဖြိုးတိုးတက်ရေးအတွက် တာဝန်ယူနေသည့်ရုံးများအနေဖြင့် အနီးကပ် ပူးပေါင်းဆောင်ရွက်မှု၊ မိတ်ဖက်ဆောင်ရွက်မှုများအတွက် လိုအပ်ချက်များနှင့် SDG ရည်မှန်းချက်များကို အကောင်အထည်ဖော်ဆောင်ရွက်မည့် နည်းလမ်းများအား အလေးထားဆောင်ရွက်သင့်ပါကြောင်း ပြောကြားပါသည်။

နိဂုံးချုပ်အနေဖြင့် ပြည်ထောင်စုဝန်ကြီးက ယနေ့တွေ့ဆုံဆွေးနွေးမှုသည် SDG အကောင်အထည်ဖော်မှုအတွက် ဘဏ္ဍာငွေရရှိရေး ဆောင်ရွက်ရာတွင် အာဆီယံနိုင်ငံများအကြားနှင့် အလားအလာရှိသည့်ဖွံ့ဖြိုးမှုမိတ်ဖက်များအကြား အဓိကဆောင်ရွက်နိုင်မည့် လုပ်ငန်းစဉ်များကို ဖော်ထုတ်နိုင်မည်ဟု ယုံကြည်ပါကြောင်း၊ ဒေသတွင်းပူးပေါင်းဆောင်ရွက်မှုများနှင့် စီးပွားရေးပြန်လည်အားကောင်းလာစေရေးတို့အတွက် တိုးမြှင့်ဆောင်ရွက်မှုများမှတစ်ဆင့် ကပ်ရောဂါ၏ထိခိုက်မှုများမှ ပြန်လည်နာလန်ထူလာပြီး စီးပွားရေး ပိုမိုကောင်းမွန်စွာ တည်ဆောက်လာနိုင်မည်ဖြစ်ပါကြောင်း ပြောကြားခဲ့ပါသည်။ 

ထို့နောက် ဖိတ်ကြားထားသည့် ထိုင်းနိုင်ငံ၊  အာရှနှင့် ပစိဖိတ်ဒေသ ကုလသမဂ္ဂလူမှုရေးနှင့်စီးပွားရေးကော်မရှင်မှ တာဝန်ရှိသူများ၊နှင့် အမေရိကန်ပြည်ထောင်စု၊ ကိုလံဘီယာတက္ကသိုလ်မှ ဆွေးနွေးပွဲတက်ရောက်လာကြသည့် နိုင်ငံတကာအဖွဲ့အစည်းများမှ အာဆီယံအဖွဲ့ဝင်နိုင်ငံများမှ ဖွံ့ဖြိုးတိုးတက်ရေးစီမံကိန်းဝန်ကြီးများက မိမိတို့နိုင်ငံအလိုက် စဉ်ဆက်မပြတ်ဖွံ့ဖြိုးမှု ပန်းတိုင်များ ပြည့်မီအောင် အကောင်အထည်ဖော် ဆောင်ရွက်နေမှုများနှင့် စပ်လျဉ်း၍ အသီးသီး ဆွေးနွေးကြပါသည်။ ဆွေးနွေးပွဲကို ညနေ(၅:၀၀) နာရီတွင် ရုပ်သိမ်းခဲ့ပါသည်။ 
သတင်းစဉ်