ဂျပန်နိုင်ငံမှကြီးမှူး၍ Online ဖြင့်ကျင်းပခဲ့သော Seminar on Economic Policies 2021 အလုပ်ရုံဆွေးနွေးပွဲသို့တက်ရောက်ခဲ့မှုနှင့်စပ်လျဉ်းသည့် အလုပ်ရုံဆွေးနွေးပွဲကို စီမံကိန်းနှင့် ဘဏ္ဍာရေးဝန်ကြီးဌာန၊ ရသုံးမှန်းခြေငွေစာရင်းဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှု သင်တန်းကျောင်းတွင် ၁၇-၆-၂၀၂၁ ရက်နေ့၊ နံနက် (၀၉:၀၀) နာရီ၌ COVID-19 ကပ်ရောဂါ ကာကွယ်ထိန်းချုပ်ရေး စည်းကမ်းသတ်မှတ်ချက်များနှင့်အညီ ကျင်းပပြုလုပ်ခဲ့ပါသည်။ 
အဆိုပါ အလုပ်ရုံဆွေးနွေးပွဲတွင် စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက သဘာပတိအဖြစ်ဆောင်ရွက်ပြီး “ပြည်သူ့အသုံးစရိတ်စီမံခန့်ခွဲမှု၊ အခွန်မူဝါဒ၊ ဘဏ္ဍာရေးမူဝါဒနှင့် ငွေကြေးမူဝါဒ၊ COVID-19 နှင့်စီးပွားရေးစိန်ခေါ်မှု” နယ်ပယ်များတွင် ဂျပန်နိုင်ငံ၏ဆောင်ရွက်နေမှုများ၊ မြန်မာ နိုင်ငံအနေဖြင့် ဆောင်ရွက်သင့်သည့် မူဝါဒရေးရာအကြံပြုချက်များကို စုပေါင်းဆွေးနွေးခဲ့ပါသည်။ 
အလုပ်ရုံဆွေးနွေးပွဲတွင် Seminar on Economic Policies 2021 သို့ တက်ရောက်ခဲ့သည့် ရသုံးမှန်းခြေငွေစာရင်းဦးစီးဌာန၊ ဒုတိယညွှန်ကြားရေးမှူး၊ ဒေါ်စုစုမော်က အလုပ်ရုံဆွေးနွေးပွဲ တက်ရောက်ခဲ့သည့်အခြေအနေနှင့် ဂျပန်နိုင်ငံ၏ မူဝါဒရေးရာ ဆောင်ရွက်ချက်များကို ရှင်းလင်းဆွေးနွေး တင်ပြရာ တက်ရောက်သူများမှ အုပ်စုအလိုက် ခွဲခြားဆွေးနွေးကြပြီး အကြံပြုသုံးသပ်ချက်များ ဖော်ထုတ်ခဲ့ပါသည်။ 
အုပ်စုအလိုက် ခွဲခြားဆွေးနွေးရာတွင် ဂျပန်နိုင်ငံ၏အတွေ့အကြုံများ အပေါ်အခြေခံ၍ မြန်မာနိုင်ငံ၏ ပြည်သူ့အသုံးစရိတ်စီမံခန့်ခွဲမှု၊ အခွန်မူဝါဒ၊ ဘဏ္ဍာရေးမူဝါဒနှင့် ငွေကြေးမူဝါဒ၊ COVID-19 နှင့် စီးပွားရေးစိန်ခေါ်မှု” တို့နှင့်စပ်လျဉ်း၍ အုပ်စု (၄) စုဖွဲ့၍ အုပ်စုအလိုက်ဆွေးနွေးခြင်း၊ အုပ်စုအလိုက် ဖော်ထုတ်ရရှိသောအကြံပြုချက်များကို ရှင်းလင်းတင်ပြခြင်းများ ဆောင်ရွက်ကြရာ အလုပ်ရုံဆွေးနွေးပွဲ သဘာပတိ ဒုတိယဝန်ကြီး ဦးမောင်မောင်ဝင်းက အုပ်စုအလိုက်ဆွေးနွေးတင်ပြမှုများအပေါ် စုစည်းသုံးသပ်ဆွေးနွေးခဲ့ပြီး အလုပ်ရုံဆွေးနွေးပွဲကို နေ့လယ် (၁၂:၀၀) နာရီအချိန်တွင် ရုပ်သိမ်းခဲ့ပါသည်။ 
အဆိုပါ အလုပ်ရုံဆွေးနွေးပွဲသို့ စီမံကိန်းရေးဆွဲရေးဦးစီးဌာန၊ ငွေတိုက်ဦးစီးဌာန၊ ပြည်တွင်းအခွန်များဦးစီးဌာန၊ ရသုံးမှန်းခြေငွေစာရင်းဦးစီးဌာနတို့မှ စုစုပေါင်း အလယ်အလတ်အဆင့် အရာထမ်း (၄၅) ဦး တက်ရောက်ခဲ့ကြပြီး၊ စီမံကိန်းနှင့်ဘဏ္ဍာရေးဝန်ကြီးဌာနအနေဖြင့် ဘာသာရပ်ဆိုင်ရာနှင့် လုပ်ငန်းဆိုင်ရာအလုပ်ရုံဆွေးနွေးပွဲများကို နိုင်ငံတော်စီမံအုပ်ချုပ်ရေးကောင်စီ၏ လမ်းညွှန်မှုနှင့်အညီ ဆက်လက်ကျင်းပဆောင်ရွက်သွားမည်ဖြစ်ကြောင်း သတင်းရရှိပါသည်။ (သတင်းစဉ်)

နေပြည်တော်၊ ဇွန် ၁၇