စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ယနေ့ နံနက် (၁၁:၀၀) နာရီတွင် ဘရူနိုင်းဒါရူဆလမ်နိုင်ငံမှ Virtual Meeting ဖြင့် အိမ်ရှင်အဖြစ် လက်ခံကျင်းပသည့် အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးသို့ နေပြည်တော်ရှိ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနမှ တက်ရောက်ခဲ့သည်။
အစည်းအဝေးတွင် အာဆီယံ+၃ နိုင်ငံများတွင် အကောင်အထည်ဖော်ဆောင်ရွက်လျက်ရှိသည့် ဇင်းမယ်အစီအစဉ်တွင် နိုင်ငံစုံပါဝင်လာရေး (Chiang Mai Initiative Multilateralisation-CMIM) လုပ်ငန်းအစီအစဉ်အရ ဆောင်ရွက်လျက်ရှိသည့် လုပ်ငန်းစဉ်များ၏ တိုးတက်မှုအခြေအနေများ၊ CMIM Agreement ပြင်ဆင်ချက်ကို အတည်ပြုဆောင်ရွက်နိုင်ရေးဆိုင်ရာကိစ္စရပ်များ၊ အာဆီယံ+၃ မက်ခရို စီးပွားရေးသုတေသနရုံး (ASEAN+3 Macroeconomic Research Office - AMRO) ၏ ၂၀၂၂ ခုနှစ် ရသုံးခန့်မှန်းခြေငွေစာရင်းနှင့် ဝန်ထမ်းအင်အား တိုးမြှင့်ဆောင်ရွက်သွားမည့် အခြေအနေများ၊ AMRO ၏ လုပ်ငန်းဆောင်ရွက်မှုအပေါ် ပြန်လည်သုံးသပ်ခြင်းဆိုင်ရာကိစ္စရပ်များ၊ COVID-19 ကပ်ရောဂါအလွန်တွင် ဆောင်ရွက်မည့် ပြန်လည်ထူထောင်ရေးအစီအစဉ်များနှင့် စပ်လျဉ်း၍ AMRO က ပြုစုသည့် ASEAN+3 Regional Economic Outlook 2021 အပေါ် ရှုမြင် သုံးသပ်ချက်များ၊ အာဆီယံ+၃ နိုင်ငံများ၏ မူဝါဒရေးရာကိစ္စရပ်များနှင့် အကောင်အထည်ဖော်မှု အခြေအနေများ၊ ရှေ့ဆက်ဆောင်ရွက်မည့်လုပ်ငန်းစဉ်များအား ညှိနှိုင်းဆွေးနွေးခဲ့ပါသည်။
အစည်းအဝေးတွင် မြန်မာနိုင်ငံမှ သက်ဆိုင်ရာခေါင်းစဉ်အလိုက် ပါဝင်ဆွေးနွေးရာ၌ AMRO တွင် ကမ္ဘောဒီးယား၊ လာအို၊ မြန်မာနှင့် ဗီယက်နမ်နိုင်ငံများမှ အရာထမ်းများက ဒေသဆိုင်ရာ မက်ခရိုစီးပွားရေးသုတေသန လုပ်ငန်းစဉ်များ၌ ပါဝင်ဆောင်ရွက်နေမှုအား တိုးမြှင့်ဆောင်ရွက် နိုင်ရေးဆိုင်ရာကိစ္စရပ်များ၊ လုပ်ငန်းအဖွဲ့များတွင် မြန်မာနိုင်ငံမှ ပါဝင်ဆောင်ရွက်လျက်ရှိသည့် financial resilience against climate and natural disasters လုပ်ငန်းအဖွဲ့၏ စွမ်းဆောင်ရည် တိုးမြှင့်ရေးဆိုင်ရာကိစ္စရပ်များ၊ COVID-19 ကပ်ရောဂါ၏ သက်ရောက်မှုအပေါ် မြန်မာအစိုးရမှ တုံ့ပြန်ဆောင်ရွက်နေသည့် အခြေအနေများနှင့် စီးပွားရေးဦးတည်ချက်များ ချမှတ်ဆောင်ရွက်နေမှု အခြေအနေများကို ပါဝင်ဆွေးနွေးခဲ့ပါသည်။ 
အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးအား အာဆီယံနိုင်ငံများနှင့် အပေါင်းသုံးနိုင်ငံများဖြစ်ကြသည့် တရုတ်၊ ဂျပန်နှင့် ကိုရီးယားသမ္မတနိုင်ငံများတွင် အိမ်ရှင်အဖြစ် အလှည့်ကျကျင်းပလျက်ရှိရာ ယခုနှစ်အတွက် အိမ်ရှင်အဖြစ် အာဆီယံနိုင်ငံများဖက်မှ ဘရူနိုင်းဒါရူဆလမ်နိုင်ငံနှင့် အပေါင်းသုံးနိုင်ငံများဖက်မှ ကိုရီးယားသမ္မတနိုင်ငံတို့က Co-Chairs များအဖြစ် လက်ခံကျင်းပလျက်ရှိပါသည်။ လက်ရှိအခြေအနေတွင် COVID-19 ဖြစ်ပွားမှုအခြေအနေ များကြောင့် အာဆီယံ+၃ အစည်းအဝေးများအား Virtual Meeting ပုံစံဖြင့် ကျင်းပဆောင်ရွက်လျက်ရှိပါသည်။ 
ယခုကျင်းပသည့် အာဆီယံ+၃ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများ အစည်းအဝေးမှ ဆွေးနွေးဆုံးဖြတ်ချက်များကို အတည်ပြုနိုင်ရေးအတွက် ၂၀၂၁ ခုနှစ်၊ မတ်လ ၃၀ ရက်နေ့တွင် ကျင်းပမည့် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဌများ အစည်းအဝေးသို့ ဆက်လက်တင်ပြဆောင်ရွက်မည်ဖြစ်ပါသည်။
ယခုအစည်းအဝေးသို့ အာဆီယံ+၃ နိုင်ငံများ၏ ဘဏ္ဍာရေးနှင့် ဗဟိုဘဏ်တို့မှ ဒုတိယဝန်ကြီးများနှင့် ဒုတိယဥက္ကဋ္ဌများ တက်ရောက်ခဲ့ကြကြောင်း သတင်းရရှိပါသည်။ 

နေပြည်တော်၊ မတ် ၂၅
သတင်းစဉ်