မြန်မာ့အရင်းအနှီးစျေးကွက်ဖွံ့ဖြိုးတိုးတက်ရေးအတွက် အပြီးသတ်အစီရင်ခံစာ တင်သွင်းခြင်းဆိုင်ရာအလုပ်ရုံဆွေးနွေးပွဲ (နေပြည်တော်၊၂၄-၈-၂၀၁၈)

မြန်မာ့အရင်းအနှီးစျေးကွက်ဖွံ့ဖြိုးတိုးတက်ရေးအတွက် မြန်မာနိုင်ငံ ငွေချေးသက်သေခံလက်မှတ် လုပ်ငန်းကြီးကြပ်ရေးကော်မရှင်(SECM)နှင့် ကိုရီးယားဖွံ့ဖြိုးမှုသိပ္ပံ(KDI) တို့၏ ၂၀၁၇/၂၀၁၈ အတွေ့ အကြုံဖလှယ်မှု အစီအစဉ်အရ အပြီးသတ်အစီရင်ခံစာ တင်သွင်းခြင်းဆိုင်ရာ အလုပ်ရုံဆွေးနွေးပွဲကို ၂၀၁၈ ခုနှစ်၊ သြဂုတ်လ ၂၄ ရက်နေ့ နံနက်ပိုင်းတွင် နေပြည်တော်ရှိ၊ Hilton Hotel ၌ ကျင်းပပြုလုပ် ခဲ့ပါသည်။

အဆိုပါအလုပ်ရုံဆွေးနွေးပွဲသို့  စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး၊ ငွေချေး    သက်သေခံလက်မှတ်လုပ်ငန်းကြီးကြပ်ရေးကော်မရှင် ဥက္ကဋ္ဌ၊ ဦးမောင်မောင်ဝင်း နှင့် ကော်မရှင်အဖွဲ့ဝင်များ၊ ပြည်သူ့လွှတ်တော် ဘဏ်များနှင့်ငွေကြေးဆိုင်ရာဖွံ့ဖြိုးတိုးတက်ရေးကော်မတီ ဥက္ကဋ္ဌ ဒေါ်ခင်စန်းလှိုင်၊ စီမံကိန်းနှင့်ဘဏ္ဍာရေးဝန်ကြီးဌာနအောက်ရှိ ဌာနဆိုင်ရာအကြီးအကဲများ၊ နိုင်ငံခြားရေးဝန်ကြီးဌာန၊ ဆောက်လုပ်ရေးဝန်ကြီးဌာန၊ ပြည်ထောင်စုရှေ့နေချုပ်ရုံး၊ မြန်မာနိုင်ငံတော်ဗဟိုဘဏ်၊ ရန်ကုန်စတော့ အိပ်ချိန်း၊ စာရင်းဝင်ကုမ္ပဏီများမှ ကိုယ်စားလှယ်များ၊ Myanmar Development Institute (MDI) မှတာဝန်ရှိသူများ၊ ကိုရီးယားသမ္မတနိုင်ငံ ကိုရီးယားစီးပွားရေးနှင့် ဘဏ္ဍာရေးဝန်ကြီးဌာနနှင့် ကိုရီးယား ဖွံ့ဖြိုးမှုသိပ္ပံတို့ ၂၀၁၄ ခုနှစ်မှ စ၍ ပူးပေါင်းဖွဲ့စည်း တည်ထောင်ခဲ့သည့် ကိုရီးယားအတွေ့အကြုံ ဖလှယ်ရေး အစီအစဉ် (Knowledge Sharing Program – KSP) ၏ အကြီးတန်းအကြံပေးပုဂ္ဂိုလ် Dr. Young – Kwa KIM ၊ KSP Project Manager, Dr.Chang Jae LEE ၊ ကိုရီးယား ပညာရှင်များ ဖြစ်သော Dr.Choong Lyol LEE၊ Dr.Kun-Ho LEE ၊ Dr.Sekyung OH ၊ KSP Team နှင့် တာဝန်ရှိသူများ တက်ရောက်ခဲ့ကြပါသည်။

          ယင်းအလုပ်ရုံဆွေးနွေးပွဲတွင် ကိုရီးယားပညာရှင်များနှင့် မြန်မာနိုင်ငံမှ အကြံပေးအရာရှိ (၃)ဦး (SECM မှ (၂)ဦး၊YSX မှ(၁)ဦး) တို့က မြန်မာ့အရင်းအနှီးစျေးကွက် ဖွံ့ဖြိုးတိုးတက်ရေးအတွက် မြန်မာနိုင်ငံတွင် ကော်ပိုရိတ်ငွေချေး စာချုပ်(Corporate Bond) စျေးကွက်တည်ထောင်ရန်၊ ငွေချေး သက်သေခံလက်မှတ်လုပ်ငန်းကြီးကြပ် ကွပ်ကဲရန်နှင့် ရန်ကုန်စတော့အိပ်ချိန်းတွင် စာရင်းဝင်ကုမ္ပဏီ အရေအတွက် တိုးပွားလာစေရန် သုတေသနပြုထားသော  ခေါင်းစဉ်များဖြင့် ဆွေးနွေး ပြောကြားခဲ့ကြ ပါသည်။ ထို့အပြင် ကိုရီးယားနိုင်ငံ၏ အရင်းအနှီးစျေးကွက် စတင်တည်ထောင်စဉ်က ကြုံတွေ့ခဲ့သည့် အတွေ့အကြုံများ၊ အခက်အခဲများ၊ စိန်ခေါ်မှုများကို သင်ခန်းစာယူကာ မြန်မာနိုင်ငံတွင် အရင်းအနှီး စျေးကွက် ဖွံ့ဖြိုးတိုးတက်လာစေရေး မူဝါဒဆိုင်ရာ အကြံပြုချက်များနှင့် တက်ရောက်လာကြသည့် နယ်ပယ်စုံမှ ပညာရှင်များ၏ ဆွေးနွေး အကြံပြုချက်များအား အပြီးသတ်အစီရင်ခံစာ၌ ထည့်သွင်း ဖော်ပြမည်ဖြစ်ပါသည်။