နေပြည်တော် ၊ ဇန်နဝါရီ ၄ 

စီမံကိန်းနှင့်ဘဏ္ဍာရေးဝန်ကြီးဌာန၊ ပင်စင်ဦးစီးဌာနဝန်ထမ်းများအတွက် အင်္ဂလိပ်စာ အရည်အချင်းမြှင့်သင်တန်းဖွင့်ပွဲအခမ်းအနားကို ယမန်နေ့၊နံနက်(၉:၀၀)နာရီတွင် နေပြည်တော်၊ ရုံးအမှတ်(၃၄)ရှိ စီမံကိန်းနှင့်ဘဏ္ဍာရေးဝန်ကြီးဌာန၊ စုပေါင်းရုံးအစည်းအဝေးခန်းမ၌ ကျင်းပရာ ပြည်ထောင်စုဝန်ကြီး ဦးဝင်းရှိန် တက်ရောက်အမှာစကားပြောကြားသည်။

ပြည်ထောင်စုဝန်ကြီးက အမှာစကားပြောကြားရာတွင် အင်္ဂလိပ်စာသည် ကမ္ဘာသုံး ဘာသာစကားဖြစ်၍ ဝန်ထမ်းတိုင်း အင်္ဂလိပ်စာကို ကောင်းမွန်စွာရေးသားပြောဆိုနိုင်ရန် လိုအပ်ကြောင်း၊ သို့မှသာ မိမိလုပ်ငန်းနှင့်သက်ဆိုင်သည့် နိုင်ငံတကာဥပဒေ၊ နည်းဥပဒေ၊ စံချိန် စံညွှန်းများကို လေ့လာနိုင်ကြမည်ဖြစ်ကြောင်း၊ ထို့ပြင် နိုင်ငံတကာနှင့် အာဆီယံကဲ့သို့သော ဒေသဆိုင်ရာအဖွဲ့အစည်းများနှင့် ပူးပေါင်းဆောင်ရွက်ရာတွင်လည်းကောင်း၊ ညှိနှိုင်းဆွေးနွေးရာ တွင်လည်းကောင်း ကောင်းမွန်စွာ ပြောဆိုဆွေးနွေးနိုင်မည်ဖြစ်ကြောင်း၊ ပင်စင်ဦးစီးဌာနသည် ဝန်ထမ်းများ အငြိမ်းစားယူသည့်အခါ ဝန်ထမ်းများအတွက် အကျိုးခံစားခွင့်ပင်စင်လစာများကို တွက်ချက်ထုတ်ပေးနေသော အရေးကြီးသည့်ဌာနတစ်ခုဖြစ်ကြောင်း၊ ယခုအခါ ပင်စင်စနစ်ကို လက်ရှိကျင့်သုံးနေသည့် သတ်မှတ်အကျိုးခံစားခွင့်စနစ် (Defined Benefit System) မှ ဝန်ထမ်း များက သက်ဆိုင်ရာနှုန်းထားဖြင့် သတ်မှတ်ထည့်ဝင်သည့်စနစ် (Defined Contribution System) သို့ ပြောင်းလဲကျင့်သုံးနိုင်ရန် ဝန်ထမ်းနောင်ရေးဗဟိုရန်ပုံငွေ (Central Provident Fund – CPF) တည်ထောင်နိုင်ရေးအတွက် ကြိုးပမ်းဆောင်ရွက်လျက်ရှိကြောင်း၊ ဝန်ထမ်းများ နောင်ရေးအတွက် ကောင်းမွန်သည့်ပင်စင်စနစ်တစ်ခု ထူထောင်နိုင်ရန် နိုင်ငံတကာဥပဒေနှင့် ပင်စင်စနစ်များကိုလေ့လာ၍ ဝန်ထမ်းနောင်ရေး ဗဟိုရန်ပုံငွေဥပဒေမူကြမ်းကို ဆက်လက် ရေးဆွဲပြုစုလျက်ရှိကြောင်း၊ ယခုသင်တန်းသို့တက်ရောက်ကြသည့် သင်တန်းသား/သူများ အနေဖြင့် အင်္ဂလိပ်စာ၏အရေးပါမှုကို အလေးအနက်ထား၍ အခွင့်အလမ်းကောင်းတစ်ခုအဖြစ် ခံယူကျင့်သုံးပြီး မိမိတို့၏ အင်္ဂလိပ်စာအရည်အသွေး ပိုမိုတိုးမြင့်လာအောင် ကြိုးပမ်းလေ့လာ သွားကြရန် တိုက်တွန်းပါကြောင်း စသည်ဖြင့် ပြောကြား ပါသည်။

သင်တန်းဖွင့်ပွဲအခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်၊ ဒုတိယဝန်ကြီးများဖြစ်သော ဦးမောင်မောင်ဝင်းနှင့် ဒေါ်သန်းသန်းလင်း၊ ဝန်ကြီးဌာန အောက်ရှိ ဌာနအဖွဲ့အစည်းများမှ ဌာနအကြီးအကဲများ၊ သင်တန်းနည်းပြများ၊ သင်တန်းသား/ သင်တန်းသူများနှင့် တာဝန်ရှိသူများ တက်ရောက်ကြသည်။

သင်တန်းသို့ သင်တန်းသား/သင်တန်းသူ (၁၂၅) ဦးတက်ရောက်ကြမည်ဖြစ်ပြီး၊ သင်တန်း အား ကိုဗစ်-၁၉ ကာကွယ်ထိန်းချုပ်ရေး လမ်းညွှန်မှုများနှင့်အညီ ရက်သတ္တပတ် (၈) ပတ်ကြာ ဖွင့်လှစ်ပို့ချသွားမည်ဖြစ်ကြောင်း သတင်းရရှိသည်။

သတင်းစဉ်