ပြည်သူ့ရေးရာစီမံခန့်ခွဲမှုပညာဘွဲ့လွန်ဒီပလိုမာနှင့် စာရင်းအင်းပညာဘွဲ့လွန်ဒီပလိုမာသင်တန်းဖွင့်ပွဲအခမ်းအနားကျင်းပ

စီမံကိန်းနှင့်ဘဏ္ဍာရေးဝန်ကြီးဌာန၊ အုပ်ချုပ်မှုနှင့်ဖွံ့ဖြိုးမှုပညာဘွဲ့လွန်သင်တန်းဌာန (GSAD) နှင့် မိတ္ထီလာစီးပွားရေးတက္ကသိုလ်တို့ ပူးပေါင်းဖွင့်လှစ်သော ပြည်သူ့ရေးရာစီမံခန့်ခွဲမှု ပညာဘွဲ့လွန်ဒီပလိုမာ (Postgraduate Diploma in Public Policy and Administration) နှင့် စာရင်းအင်းပညာဘွဲ့လွန်ဒီပလိုမာ (Postgraduate Diploma in Statistics) သင်တန်းဖွင့် ပွဲအခမ်းအနားကို ယနေ့နံနက် ၉:၀၀ နာရီတွင် နေပြည်တော်ရှိ အမျိုးသားမှတ်တမ်းများ မော်ကွန်းတိုက်ဦးစီးဌာန၌ ကျင်းပခဲ့ပါသည်။ အခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးဦးစိုးဝင်း၊ ဒုတိယဝန်ကြီးဦးမောင်မောင်ဝင်း၊ စီမံကိန်းနှင့်ဘဏ္ဍာရေးဝန်ကြီးဌာနမှ ညွှန်ကြားရေးမှူးချုပ် များ၊ မိတ္ထီလာစီးပွားရေးတက္ကသိုလ်မှ ဒုတိယပါမောက္ခချုပ်နှင့် ဌာနမှူးများ၊ ပို့ချဆရာ/ ဆရာမများ၊ ပြည်သူ့ရေးရာ စီမံခန့်ခွဲမှုပညာဘွဲ့လွန်ဒီပလိုမာနှင့် စာရင်းအင်းပညာဘွဲ့လွန် ဒီပလိုမာ သင်တန်းသား၊ သင်တန်းသူများတက်ရောက်ခဲ့ကြသည်။ အခမ်းအနားတွင် ပြည်ထောင်စုဝန်ကြီးက ဝန်ထမ်းများ၏စွမ်းဆောင်ရည်မြင့်မားရန်နှင့် လူ့စွမ်းအားအရင်းအမြစ် ဖွံ့ဖြိုးတိုးတက်စေရန်အတွက် ရည်ရွယ်၍ ပြည်သူ့ရေးရာမူဝါဒနှင့် အုပ်ချုပ်မှုပညာဘွဲ့လွန်ဒီပလိုမာ (PG Dip in PPA) နှင့် စာရင်းအင်းပညာဘွဲ့လွန် ဒီပလိုမာ (PG Dip in Stats) သင်တန်းများဖွင့်လှစ်ရခြင်းဖြစ်ကြောင်း၊ သင်တန်းများအား ပညာရေး ဝန်ကြီးဌာန၊ မိတ္ထီလာစီးပွားရေးတက္ကသိုလ်နှင့် ပူးပေါင်းပြီးပညာရေးဝန်ကြီးဌာနမှ အသိအမှတ် ပြုသည့် ဘွဲ့လွန်ဒီပလိုမာလက်မှတ်များပေးအပ်သည့် Accreditation ရရှိအောင် ဆောင်ရွက် ထားပါကြောင်း၊ ထို့ပြင် သင်ကြားသည့် Course/Syllabus များကိုလည်း စနစ်တကျ ရေးဆွဲ ပြဌာန်းထားပြီးလည်းဖြစ်ကြောင်း၊ ဆက်လက်ပြီး ဘွဲ့လွန်ဒီပလိုမာအောင်မြင်ထားသူများကို မာစတာဒီဂရီအဆင့်အထိ တက်ရောက်ခွင့်ရရန်လည်း ဆောင်ရွက်လျက်ရှိပါကြောင်းဖြင့် ပြောကြားခဲ့သည်။ ပြည်သူ့ရေးရာစီမံခန့်ခွဲမှုပညာဘွဲ့လွန်ဒီပလိုမာ (Postgraduate Diploma in Public Policy and Administration)သို့သင်တန်းသား/သူ (၆၇) ဦးနှင့် စာရင်းအင်းပညာဘွဲ့လွန် ဒီပလိုမာ (Postgraduate Diploma in Statistics) သင်တန်းသို့ သင်တန်းသား/သူ (၆၄) ဦး စုစုပေါင်း(၁၃၁) ဦး တက်ရောက်ကြမည်ဖြစ်ပြီး သင်တန်းကာလမှာ တစ်နှစ်ကြာမြင့်မည် ဖြစ်ပါသည်။ သင်တန်းများတွင် နိုင်ငံ့ဝန်ထမ်းများ၏ စွမ်းဆောင်ရည်မြှင့်တင်ပေးရန်၊ ပြည်သူ့ရေးရာ မူဝါဒများချမှတ်နိုင်ရေးအတွက် သဘောတရားများကိုသင်ကြားပေးရန်နှင့် လေ့ကျင့်ပေးရန်၊ စာရင်းဇယားအချက်အလက်များ တိကျမှန်ကန်စွာရရှိနိုင်ရန်၊ နိုင်ငံတော်၏ အုပ်ချုပ်မှု ယန္တရား ကောင်းမွန်စေရန်အတွက် တာဝန်ယူဆောင်ရွက်မည့် အရည်အသွေးပြည့်ဝသော စွမ်းဆောင်ရည် ပြည့်ဝသည့် နိုင်ငံ့ဝန်ထမ်းခေါင်းဆောင်ကောင်းများ မွေးထုတ်ပေးရန်နှင့် လေ့ကျင့်ပျိုးထောင်ပေး ရန်အတွက် စာတွေ့လက်တွေ့ ကွင်းဆင်းလေ့လာခြင်း၊ စာတမ်းများ တင်သွင်းခြင်းများဖြင့် သင်ကြားပို့ချပေးသွားမည်ဖြစ်ပါသည်။(သတင်းစဉ်)

,