မြန်မာ-တရုတ်စီးပွားရေးစင်္ကြံဖွံ့ဖြိုးတိုးတက်မှုမြှင့်တင်ခြင်းဆိုင်ရာ ပထမ အကြိမ်ပူးတွဲကော်မတီ အစည်းအဝေး၊ မြန်မာ-တရုတ်စီးပွားရေးစင်္ကြံဖိုရမ်နှင့် တရုတ်-အာဆီယံကုန်စည်ပြပွဲတို့သို့ စီမံ ကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးဦးစိုးဝင်းနှင့် မြန်မာကိုယ်စားလှယ်အဖွဲ့တက်ရောက်

စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း ဦးဆောင်သည့် မြန်မာ ကိုယ်စာလှယ်အဖွဲ့သည် စက်တင်ဘာလ (၈) ရက်နေ့မှ (၁၄)ရက်နေ့အထိ တရုတ် ပြည်သူ့သမ္မတ နိုင်ငံ ပေကျင်းမြို့နှင့် နန်နင်းမြို့များသို့ သွားရောက်ကာ မြန်မာ-တရုတ် စီးပွားရေးစင်္ကြံ ဖွံ့ဖြိုး တိုးတက်မှု မြှင့်တင်ခြင်းဆိုင်ရာ ပထမအကြိမ် ပူးတွဲကော်မတီ အစည်းအဝေး၊ မြန်မာ-တရုတ် စီးပွားရေးစင်္ကြံဖိုရမ်နှင့် တရုတ်-အာဆီယံ ကုန်စည်ပြပွဲတို့သို့ တက်ရောက်ခဲ့ပြီး ယနေ့ မွန်းလွဲပိုင်း တွင် ပြည်ထောင်စုသမ္မတ မြန်မာနိုင်ငံသို့ ပြန်လည်ရောက်ရှိသည်။      

ခရီးစဉ်အတွင်း ပြည်ထောင်စုသမ္မတ မြန်မာနိုင်ငံတော်အစိုးရနှင့် တရုတ်ပြည်သူ့သမ္မတနိုင်ငံ အစိုးရတို့အကြား တရုတ်-မြန်မာ စီးပွားရေးစင်္ကြံ ပူးတွဲတည်ထောင်ရေးဆိုင်ရာ  နားလည်မှု စာချွန်လွှာ လက်မှတ်ရေးထိုးပွဲ အခမ်းအနားကို စက်တင်ဘာလ ၉ ရက်နေ့တွင် တရုတ် ပြည်သူ့ သမ္မတနိုင်ငံ၊ ပေကျင်းမြို့၌ ကျင်းပခဲ့ပြီး အဆိုပါ နားလည်မှုစာချွန်လွှာကို ပြည်ထောင်စု သမ္မတ မြန်မာနိုင်ငံတော်အစိုးရကိုယ်စား စီမံကိန်းနှင့်ဘဏ္ဍာရေး၀န်ကြီးဌာန၊ ပြည်ထောင်စုဝန်ကြီး ဦးစိုးဝင်းနှင့် တရုတ်ပြည်သူ့သမ္မတနိုင်ငံ အစိုးရကိုယ်စား အမျိုးသားဖွံ့ဖြိုးတိုးတက်ရေးနှင့် ပြုပြင် ပြောင်းလဲမှုကော်မရှင်ဥက္ကဋ္ဌ Mr. He Lifeng(မစ္စတာဟယ်လီဖုန်း) တို့က လက်မှတ်ရေးထိုးခဲ့ကြ ပါသည်။

နားလည်မှုစာချွန်လွှာအရ အခြေခံအဆောက်အအုံ တည်ဆောက်ခြင်း၊ ကုန်ထုတ်လုပ်မှု စွမ်းအားနှင့် ရင်းနှီးမြှုပ်နှံမှု၊ စွမ်းအင်၊ သဘာဝအရင်းအမြစ်၊ စိုက်ပျိုးရေးနှင့် ခရီးသွားလုပ်ငန်း၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေး စသည့်ကဏ္ဍကြီး (၁၅)ခုတို့တွင် ပူးပေါင်းဆောင်ရွက် ခြင်းဖြင့်မြန်မာ-တရုတ် နှစ်နိုင်ငံ ပြည်သူများ၏ လူမှုအကျိုးစီးပွား တိုးတက်ကောင်းမွန် လာစေရေး တို့ကို များစွာ အထောက်အကူပြုနိုင်မည်ဖြစ်ပါသည်။ နားလည်မှုစာချွန်လွှာအရ လုပ်ငန်းများ အကောင်အထည်ဖော် ဆောင်ရွက်ရာတွင် နိုင်ငံတကာမှ ရင်းနှီးမြှုပ်နှံသူများ၊ ကမ္ဘာ့ဖွံ့ဖြိုးမှု မိတ်ဖက် အဖွဲ့အစည်းများကိုပါ ဖိတ်ခေါ်ဆောင်ရွက်သွားကြမည်ဖြစ်ပါသည်။

ပြည်ထောင်စုဝန်ကြီး ဦးဆောင်သည့် ကိုယ်စားလှယ်အဖွဲ့သည် တရုတ်ပြည်သူ့သမ္မတနိုင်ငံမှ ဘဏ္ဍာရေးအဖွဲ့အစည်းများဖြစ်သည့် တရုတ်ဘဏ်(Bank of China)၊ အာရှရင်းနှီးမြှုပ်နှံမှုနှင့် အခြေခံအဆောက်အဦ ဖွံ့ဖြိုးတိုးတက်ရေးဘဏ်(AIIB)နှင့် CITIC Group တို့မှ တာဝန်ရှိသူ များနှင့် တွေ့ဆုံကာ မြန်မာနိုင်ငံတွင် ဘဏ္ဍာငွေအရင်းအနှီးနှင့် ဘဏ်လုပ်ငန်းဆိုင်ရာ ကိစ္စရပ်များ ဖွံ့ဖြိုးတိုးတက်ရေး အပြန်အလှန် အမြင်ချင်း ဖလှယ်ဆွေးနွေးခဲ့ပါသည်။

၎င်းနောက် ပြည်ထောင်စုဝန်ကြီး ဦးဆောင်သည့် ကိုယ်စားလှယ်အဖွဲ့သည် စက်တင်ဘာလ (၁၁)ရက်နေ့တွင် ပေကျင်းမြို့၌ ကျင်းပသည့် မြန်မာ-တရုတ် စီးပွားရေးစင်္ကြံ ဖွံ့ဖြိုးတိုးတက်မှု မြှင့်တင်ခြင်းဆိုင်ရာ ပထမအကြိမ် ပူးတွဲကော်မတီ အစည်းအဝေးကို တက်ရောက်ကာ စီးပွားရေး စင်္ကြံ အကောင်အထည်ဖော်ဆောင်ရေးအတွက် နှစ်နိုင်ငံအကြား ရှေ့ဆက်ဆောင်ရွက်ရမည့် ကိစ္စရပ် များနှင့် ပတ်သက်၍ ဆွေးနွေးခဲ့ကြသည်။ အဆိုပါ အစည်းအဝေးမှ နှစ်နိုင်ငံအကြား ရှိရင်းစွဲ ချစ်ခင်ရင်းနှီးမှုကို အခြေခံလျက် နှစ်နိုင်ငံလုံး၏ သဘာဝပတ်ဝန်းကျင်၊ ရိုးရာယဉ်ကျေးမှု၊ ဘာသာ တရားများကို လေးစားလိုက်နာကာ နိုင်ငံတကာ လုပ်ထုံးလုပ်နည်းများနှင့်အညီ လုပ်ဆောင်သွား ကြရန်လည်း သဘောတူညီခဲ့ကြပါသည်။

ပြည်ထောင်စုဝန်ကြီး ဦးဆောင်သည့် မြန်မာကိုယ်စားလှယ်အဖွဲ့သည် စက်တင်ဘာလ (၁၂) ရက်နေ့တွင် ပေကျင်းမြို့မှ နန်နင်းမြို့သို့ ဆက်လက်ထွက်ခွာခဲ့ကြပြီး တရုတ်-အာဆီယံ ကုန်စည် ပြပွဲသို့ သွားရောက်လေ့လာခဲ့ကြသည်။ ပြည်ထောင်စုဝန်ကြီး ဦးစိုးဝင်းနှင့် မြန်မာကိုယ်စားလှယ် အဖွဲ့သည် စက်တင်ဘာလ (၁၃)ရက်နေ့ နံနက်ပိုင်းတွင် နန်နင်းမြို့၊ တရုတ်-အာဆီယံ ကုန်စည်ပြပွဲ ခန်းမ၌ ကျင်းပသည့် Natural Myanmar Promotion Conference သို့ တက်ရောက်ခဲ့ကြသည်။

ထို့အတူ ပြည်ထောင်စုဝန်ကြီးနှင့်အတူ လိုက်ပါလာသည့် စီမံကိန်းနှင့်ဘဏ္ဍာရေးဝန်ကြီးဌာန အမြဲတမ်းအတွင်းဝန် ဦးထွန်းထွန်းနိုင်နှင့် မြန်မာကိုယ်စားလှယ် အဖွဲ့သည် တရုတ်ပြည်သူ့သမ္မတ နိုင်ငံ၊ အမျိုးသားဖွံ့ဖြိုးတိုးတက်ရေးနှင့် ပြုပြင်ပြောင်းလဲမှု ကော်မရှင်မှ Wanda Vista Hotel တွင် ဦးဆောင်ကျင်းပသည့် လန်ချန်း-မဲခေါင် နိုင်ငံများအကြား ကုန်ထုတ်လုပ်မှုစွမ်းအားနှင့် ရင်းနှီးမြှုပ်နှံ မှု ပူးပေါင်းဆောင်ရွက်ရေးဖိုရမ်သို့ တက်ရောက်ခဲ့ပါသည်။

နေ့လယ်ပိုင်းတွင် ပြည်ထောင်စုဝန်ကြီး ဦးဆောင်သည့် မြန်မာကိုယ်စားလှယ်အဖွဲ့သည် နန်နင်းမြို့၊ Wanda Vista Hotel ၌ ကျင်းပသည့် မြန်မာ-တရုတ် စီးပွားရေးစင်္ကြံဖိုရမ်သို့ တက်ရောက်ခဲ့ကြပါသည်။ အဆိုပါ အခမ်းအနားကို ကွမ်ရှီးဇောင်း ကိုယ်ပိုင်အုပ်ချုပ်ခွင့်ရဒေသ ဒုတိယအုပ်ချုပ်ရေးမှူး မစ္စတာကျွင်ယူပေး (H.E.QinRupei)မှ အဖွင့် အမှာစကား ပြောကြားခဲ့ပြီး ပြည်ထောင်စုဝန်ကြီးနှင့် တရုတ်ပြည်သူ့သမ္မတနိုင်ငံ၊ အမျိုးသားဖွံဖြိုး တိုးတက်ရေးနှင့် ပြုပြင် ပြောင်းလဲရေး ကော်မရှင် ဒုတိယဥက္ကဌ မစ္စတာနင်ဂျင်ရှီး(Ning Jizhe) တို့က အဓိကမိန့်ခွန်းကို ပြောကြားခဲ့သည်။ အဆိုပါအခမ်းအနားသို့ နှစ်ဖက်အစိုးရမှ တာဝန်ရှိသူများနှင့် ပုဂ္ဂလိကကဏ္ဍမှ လုပ်ငန်းရှင်များ စုစုပေါင်း(၅၀၀) ခန့်အထိ တက်ရောက်ခဲ့ကြကြောင်း သတင်း ရရှိပါသည်။

(သတင်းစဉ်)

နေပြည်တော် စက်တင်ဘာ ၁၄