မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း အကောင်အထည်ဖော်ရာ၌ စောင့်ကြည့်အကဲဖြတ်နိုင်စေရန် အမျိုးသားညွှန်ကိန်းမူဘောင်တစ်ရပ် ဖွံ့ဖြိုးလာစေရေးအတွက် လုပ်ငန်းအဖွဲ့(၅)စိုက်ပျိုးရေးနှင့် ရေရရှိမှုဆိုင်ရာလုပ်ငန်းအဖွဲ့ (Agriculture and Water) နှင့် စပ်လျဉ်းသည့် ဒုတိယအကြိမ် အလုပ်ရုံဆွေးနွေးပွဲ ကျင်းပခြင်း

         မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable Development Plan - MSDP) အကောင်အထည်ဖော်ရာ၌ စောင့်ကြည့်အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework - NIF) တစ်ရပ်ဖွံ့ဖြိုးလာစေရေးအတွက် လုပ်ငန်းအဖွဲ့(၅) စိုက်ပျိုးရေးနှင့် ရေရရှိမှု ဆိုင်ရာ လုပ်ငန်းအဖွဲ့ (Agriculture and Water) နှင့် စပ်လျဉ်းသည့် ဒုတိယအကြိမ် အလုပ်ရုံ ဆွေးနွေးပွဲအား ၂၀၁၈ ခုနှစ်၊ ဒီဇင်ဘာလ(၃)ရက်နေ့တွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂) အစည်းအဝေးခန်းမ၌ ကျင်းပရာ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားခဲ့ ပါသည်။

          ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အဖွင့်အမှာစကား ပြောကြားရာတွင် ယခုကျင်းပသည့် ဆွေးနွေးပွဲသည် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း အကောင်အထည်ဖော်ရာ၌ စောင့်ကြည့်အကဲဖြတ်နိုင် စေရန်၊ အမျိုးသားညွှန်ကိန်းမူဘောင်တစ်ရပ်ဖွံ့ဖြိုးလာစေရန်၊ ပန်းတိုင်(၃)ဖြစ်သည့် အလုပ်အကိုင် ဖန်တီးရေးနှင့် ပုဂ္ဂလိကကဏ္ဍဦးဆောင်သည့် ဖွံ့ဖြိုးရေး၊ မဟာဗျူဟာ-၃.၁ ကျေးလက်ဒေသ ဆင်းရဲမှုလျော့ချရေးအတွက် အခြေခံဖြစ်သည့် အားလုံးပါဝင်သော ဘက်စုံစိုက်ပျိုးမွေးမြူရေး အလေ့အထများဖြင့် ထုတ်ကုန်မျိုးစုံ ထုတ်လုပ်နိုင်စွမ်းရှိသော စီးပွားရေးကို ပံ့ပိုးမည့် ဝန်းကျင် တစ်ရပ်ဖန်တီးရေးနှင့် ပန်းတိုင်(၅) ဖြစ်သည့် နိုင်ငံ၏အနာဂတ်မျိုးဆက်များ အတွက် သယံဇာတ နှင့် သဘာဝပတ်ဝန်းကျင်၊ မဟာဗျူဟာ(၅.၃) သဘာဝပတ်ဝန်းကျင်ရေရှည် တည်တံ့စေမည့် နည်းလမ်းများဖြင့် လုံခြုံစိတ်ချ၍ သာတူညီမျှရှိသော သောက်သုံးရေနှင့် ရေဆိုးစွန့်ပစ်စနစ်ရရှိရေး တို့အတွက် လုပ်ငန်းအဖွဲ့-၅၏ ​ဆွေးနွေးပွဲဖြစ်ပါကြောင်း၊ စောင့်ကြည့်လေ့လာခြင်းနှင့် အကဲဖြတ်ခြင်း လုပ်ငန်းအတွက် လိုအပ်လျက်ရှိသော ညွှန်ကိန်းများကို သက်ဆိုင်ရာ ဝန်ကြီးဌာန/ ဦးစီးဌာနများမှ ပူးပေါင်းဖော်ထုတ်သွားရန်လိုအပ်ပါကြောင်း၊  မြန်မာနိုင်ငံ၏ ရေရှည်တည်တံ့ ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable Development Plan-MSDP)လုပ်ငန်းစဉ် တစ်လျှောက် မျက်ခြေမပြတ် စောင့်ကြည့်လေ့လာရန် အတွက် အမျိုးသားညွှန်ကိန်းမူဘောင်ကို အကောင်အထည်ဖော်ရခြင်း ဖြစ်ပါကြောင်း၊ ညွှန်ကိန်းများ ကောင်းမွန်စွာပေါ်ထွက်လာစေရေး ဝိုင်းဝန်းဆွေးနွေးပေးကြစေလိုပါကြောင်း ပြောကြားခဲ့ပါသည်။

          ထို့နောက် သက်ဆိုင်ရာဌာန အသီးသီးမှ လုပ်ငန်းအဖွဲ့(၅) ဆွေးနွေးပွဲသို့ တက်ရောက် လာကြသော အဖွဲ့ဝင်များမှ အုပ်စုများခွဲ၍ မဟာဗျူဟာ အလိုက် တိုင်းတာနိုင်မည့် ညွှန်ကိန်းများ အပေါ် ဝိုင်းဝန်း အကြံပြုဆွေးနွေးခဲ့ကြပါသည်။

          အဆိုပါလုပ်ငန်းအဖွဲ့(၅) ဆွေးနွေးပွဲသို့ သက်ဆိုင်ရာဌာနများမှ အဖွဲ့ဝင်(၄၀)ဦး၊ ဗဟို စာရင်းအင်းအဖွဲ့မှ (၂၅)ဦး၊ စုစုပေါင်း (၆၅)ဦး တက်ရောက်ခဲ့ပါသည်။(သတင်းစဉ်)

နေပြည်တော်၊ ဒီဇင်ဘာလ (၃) ရက်

,